عفراء علوي محمدي- كود//

سفيان البحري دارها قد راسو عاوتاني وخربق المغاربة ودوخهم، من بعدما حط تدوينة على خبار مفبرك كيقول فيه أن الملك محمد السادس عطا تعليماتو باش تتزاد 48 ساعة إضافية على تطبيق قرار منع التنقل من وإلى مدن طنجة وتطوان وفاس ومكناس وكازا وبرشيد وسطات ومراكش.

البحري، “المؤثر” المعروف بنشر أخبار كتتعلق بالملك والصور ديالو وديال عائلتو خلى الناس كاملين تبارطاجي تدوينتو على نطاق واسع وتتكلم عليها، وعطاهم أمل باش يمشيو يعيدو مع عائلاتهم، لكن دازت بضع ساعات وهو يمسح التدوينة من عندو، على اعتبار ان مضمونها ماشي صحيح.

المشكل فهذشي أن الناس مازال واخدين مضمون التدوينة على محمل الجد، وكيبارطاجيو فيها على أنها صحيحة، وبزاف متيقين هذ الخبار ومتفاعلين معاه بشكل كبير.

البحري خاصو يدخل سوق راسو شوية، ويخلي بحال هذ الأخبار والقرارات المهمة تتكلف بيهم المؤسسة الملكية اللي عندها الهيئات ديالها اللي كتصدر بلاغات عند كل جديد، والاجتهادات ديالو الخاوية غادي تسبب فمشاكل كبيرة للناس، خصوصا فهذ الأزمة ديال فيروس كورونا المستجد، وتزامن ارتفاع الإصابات بالفيروس مع عيد الكبير.