كود احمد الطيب الرباط ///

علمت “كود” ان “اتصالات المغرب” واجدة باش تبدا خدامة ف”جي 5″ اي الجيل الخامس اللي بدات فالعالم فبداية هاد العام. المشكلة لحد الان بيد الدولة.

خاص الدولة تعطي الموافقة على منح دبدبات “اتصالات المغرب” باش تقدر دير فيها “جي 5”. طبعا الدولة عبر الوكالة الوطنية لتقنين المواصلات وهاد الشي عندو علاقة باجهزة حساسة فالدولة. هما يوافقو على منح هاد الدبدبات وتاخدهم الوكالة وتقدمهم لشركات الاتصالات.

دابا المغرب من الدول لقلال عند لعرب اللي قادر يخدم “جي 5”. كاين هو والامارات والسعودية وقطر.. دابا غير خاص يطلقونا للعب

تقنية “جي 5” اخر ما غنات ام كلثوم فالاتصال فالتلفونات. غادي يكون معاها الانترنيت سريع بزاف وتشوفو الفيديوهات بلا ما تقطع. غير باش تاخدو فكرة: السرعة مع 5 جي غادية تكون 100 مرة اسرع مما عليه مع “جي 4” وكاع الملفات اللي كتيليشاريجهم غاديين يتيليشاريجو فاللحظة وتقدر تتكلم فالواتساب بلا ما يتقطع وامور كثيرة اخرى