عمـر المزيـن – كود الرباط//

علاش والي جهة فاس مكناس عامل عمالة فاس سعيد زنيبر مابغاش ينفسها شويا على فاس ومخلي الاقتصاد والسياحة تاكل لعصا مزيان؟. الحالة الوبائية ففاس استقرت بواحد الشكل غير مسبوق. إصابات قليلة تسجل عكس مدينة مكناس اللي دبا رجعات كتسجل اكثر من فاس بشي فرق قليل.

البارح عبد الغني الصبار عامل عمالة مكناس زاد ساعة لصحاب المطاعم. دبا رجعو كيسدو مع الـ11 ونص ديال الليل بعدما كانو كيسدو مع الـ10 ونص. كيفاش عامل مكناس دار هاد المبادرة باش ينفسها على مدينتو علما أن الحالة الوبائية ممستقراش مزيان وعامل فاس زنيبر بقا مزير على قطاع السياحة اللي تضرر بزاف.

وأوضح عزيز اللبار، رئيس المجلس الجهوي للسياحة لجهة فاس مكناس، في تصريح لـ”كود”، قائلاً: “هادشي اهضرنا فيه السيمانة الفايتة، وقلنا ليهوم راه مراكش كتبقى حتى لـ12 ديال الليل، وراه عندنا اجتماع يوم الإثنين المقبل وغادي نطرحو ليهوم هاد المسألة”.

وتابع اللبار الفاعل السياحي صاحب مجموعة الفنادق بالمغرب قائلاً: “اللقاء اللّي كان عندنا مع وزير الداخلية فهمنا منو أن المطاعم خاصها تسد مع الـ12 لكن دبا قالو ليك مع الـ11 ديال الليل، وقالو بأن فاس لا زالت مصنفة في المنطقة 2”.