كود مصطفى الشاذلي كازا ///

كان نقاش علاش ما حضرش سعيد الناصري باعتبارو رئيس العصبة سعيد الناصري اللي هو رئيس فنفس الوقت للوداد لتتويج نادي الرجاء البيضاوي بالبطولة قبل ايام فكازا.

طبعا مع هاد التوتر لكبير اللي كان وديما غادي يبقى بين الرجاء والوداد وهاد العام كان مضاعف حتى اخر دقيقة فالبطولة٬ تزادت حدة النقاش على هاد الحضور.

بالنسبة لمصدر ودادي مقرب من سعيد الناصري ل”كود” فرئيس العصبة الاحترافية لكرة القدم ما توجهاتش ليه الدعوة. هاد القضية مردود عليها يشرح مصدر جامعي ل”كود” “هاد الهدرة ما شاداش٬ “اولا لان العصبة هي اللي نظمات” وثانيا “راه العصبة كانت حاضرة”.

المصدر الودادي زاد ل”كود” نقطة اخرى وهي ان رئيس العصبة سبق وما حضرتش لتتويج اتحاد طنجة باش دات البطولة وغاب عن تتويج الفتح فالرباط كذلك.

الجامعة زادت وضحات ل”كود” باللي الذرع كتعطيه الجامعة وهادا ما كان والعصبة كانت ممثلة.

لكن السبب الرئيسي لهاد الصداع هو العداوة الدائمة بين الغريمين: الراجا والوداد. مصدر الحمرا ل”كود” قال “والرجاويين قالو البطولة فاسدة علاش بغاو يعرضو على الناصري؟”٬ مصدر اخر اكد ل”كود” باللي عادي جدا ما يحضرش نادي الوداد لتتويح نادي الرجاء والعكس صحيح