كود سعيد الشاوي ا ف ب ///

الاتحاد الاوربي باغي ينقذ اقتصاد البلدان الاعضاء. هاد ليام بدات دول كثيرة كتقلل اجراءات حالة الطوارئ وتسمح للمواطنين باش يخرجو بشكل تدريجي. مع هاد الاجراءات قدمات اليوم المفوضية الاوربية مقترح كيسمح للسياح اللي دارو الڤاكسان كاملة يدخلو دول الاتحاد. يعني لمغاربة او الشينوا او الامريكيين او الروس … اللي دارو الڤاكسان ما محتاجين لوالو باش يدخلو لوحدة من دول اعضاء الاتحاد.
المقترح جا فيه ان القرار كيشمل السياح اللي سالاو الڤاكسان اللي اقرها الاتحاد او منظمة الصحة العالمية  قبل 14 يوما على الأقل من موعد وصولهم إلى دول التكتل.

هاد المقترح كان قبلو تصريح لرئيسة المفوضية أورسولا فون دير لايين قالت فيه السيمانا اللي فاتت باللي ممكن للسياح الامريكيين اللي دارو الڤاكسان يدخلو لدول الاتحاد.

هاد الاتحاد كان قرر اطلاق شهادات صحية اوربية غادي يبداو الخدمة بها فاواخر يونيو.

دابا هادي عام وشهرين والاتحاد الاوربي ساد حدودو على مواطني العالم. ما كيسمح يدخل ليه من غير اللي عندهم لقراية او امور عندها علاقة بالصحة….

دابا غير حنا اللي مازال ما عارفينش اش باغيين. لحد الان ما كاين حتى شي قرار على عودة فتح الخطوط الجوية مع الدول الاوربية اللي نقصات فيها الحالات. علاش المغرب ما يفرضش فقط الڤاكسان على السياح اللي داروه كشرط باش يدخلو للبلاد.

ملايين الاوربيين داروه وباغيين يسافرو ولكن سادين الحدود وما كاينش حتى شي تاريخ واضح على عودة فتحها. دابا اللي مستافد هي تونس اللي سبقات كلشي وبدات كتستقبل السياح.