كود أكادير//

المئات من المستخدمين في الكازينوهات فالمغرب ضايعين، لا دعم ولا تعويضات عن وقف العمل بسبب الجايحة، إلى حدود الساعة، هاد المستخدمين لي يقدرو يوصلو كثر من 800 مستخدم ف 7 كازينوهات لي كاينا فالمغرب، مستقبلهم غامض ومعارفينش شنو كيستناهم.

وحسب مستخدمين هضرو مع “كود” فإن الوضعية صعيبة حاليا، منذ مارس 2020 إلى حدود الآن، مكاينش تا شي معلومة رسمية وغير رسمية امتا غانحلو.

فمدينة أكادير مثلا ، فيها 3 كازينوهات كيشتغلو فيها تقريبا 500 شخص لي هازين المئات من العائلات، دبا ضايعين وتالفين.

أحمد مستخدم فاكازينو بأكادير قال لـ”كود” :”كنمشيو نسولو القايد ولا الولاية، كيقولو لينا مفرسناش يمتا نحلو، مكيعطيوناش راس الخيط، علما ان الكازينو فاش خدام مثلا كيعطي مداخيل بالملايير للضريبة وللجماعة وكنساهمو فالتنمية ديال المدينة، غير كراء لوكال كيكلف تقريبا 40 تال 80 مليون فالشهر”.

أحمد خدام فكازينو منذ سنة 2014، كشف لـ”كود” بلي الوضعية صعيبة والمستقبل غامض، وقال بلي :”اخر حاجة تقالت هو اننا نفتحو نهار 16 مارس، لكن لي تحلو هوما لي بواط، بالرغم ان الريسك ديال لي بواط اكبر من الكازينوهات”.

الكازينوهات فاكادير مثلا مستثمرين فيها اجانب، شركة اسبانية معروفة سميتها cirsa، ماليها تالفين مقلقين من الاغلاق، واش يهزو حوايجهم ويمشيو لبلاد اخرى يستثمرو فيها ولا يبقاو فحالة الغموض بسبب استمرار الاغلاق.

اضافة الى هادشي، ملايير كاضيع على ميزانية الدولة، ملايير محتاجها الدولة فهاد الازمة الخانقة.