كود هند لكلاوي مراكش ///
فكازا طاشرونات كانو مقدمين ولا عندهم مصبنة ولا شيوخ ولاو ملايرية. فمراكش نفس الظاهرة. عندهم بحال بن الدرقاوي اللي كان گارديان وولى من ملايرية مراكش. ما قاري ما والو وفوقت قصير ولى امبراطور الليل والمحلات ديالو مخصصة غير للسواعدة اي الدعارة الراقية فمراكش.
المفارقة فهاد العينة هي كيسميو ريوسهم “الحاج”. هادي هي سميتو.
حسب ما علمته “كود” فعدد من جيرانو فالاقامة اللي ساكنين فيها فبالموري بمراكش دعاوه. ماشي غير على اش دار فالملكية المشتركة فقط من مشاريع فاقامات سكنية٬ بل حتى على موضوع السانديك. هاد الحاج سانديك لسنوات. عدد من اللي هدرات معاهم “كود” قالو ما عمرهم توصلو بشي اجتماع السانديك. وانهم تصدمو بالمشاريع السياحية اللي كيحشم المغربي يشوف شكون كيجي ليها.
هادو قالو باللي دعاوه والقضية مليوحة فالقضاء. وقالو باللي كيقول ليهم راه محمي من الجيش ومن القضاء ومن كلشي.
لكن كيفاش ولى هاد العساس ملايري؟ وفق مصدر مراكشي ل”كود” فهاد الطاشرون باش كيمشي للسعودية كيستقبلوه بحال الشخصيات لكبيرة. الطونوبيلة قدام الطيارة ولوطيلات الواعرين؟ علاش هاد الشي؟ حقاش جينرالات السعودية وبعض امراءها كيجيو لشققو وفيلاتو واوطيلاتو هنا فمراكش وكيوجد ليهم الليالي البيضا والحمرا وفيها كاع الالوان.
بهاد العلاقات مع ناس الجيش فالسعودية دار علاقات مع شي وحدين فالجيش فالمغرب وولات عندو اقامات فاخرة فبالموري. شهادات اللي ساكنين تماك نقلات ل”كود” باللي تحشم تقول على راسك مغربي باش تشوف حجم الدعارة اللي كاينة تماك. المغربي الوحيد فهاد الاقامات هما لبنات واللي كيخدمو. كلشي لكليان حصري على الخليجيين
هاد العساس اللي ولى ملك الليل بكل مصائبو فمراكش بدا حياتو كيكري الديور والڤيلات. جمع شوية لفلوس وهو يشري شي شقق فممر النخيل. كان كيكريها من خلال شركة ديالو فالوساطة العقارية للخليجيين. وسع نشاطو ودخل فاراضي متنازع عليها كيف حالة اللي مقدمين بيه دعوى قضائية.
بن الدرقاوي وبعد ما جمع ثروة كبيرة من هاد الانشطة ديال كراء الديور ودار مركب تجاري وترفيهي يضم ملاهي ومطاعم بممر النخيل فاقامة سكنية. عندو شكايات كثيرة توصلات بها مصالح الولاية ولكن حتى حد ما يقدر يقلق هاد الامبراطور. هو كيقول باللي ما عندو مناش يخاف.
أسس بن الدرقاوي إلى جانب شركته المتخصصة في العقار سماها “البهجة”، وكالة الاسفار وأخرى لكراء السيارات، ليوفر بذالك كل ما كان يرغب فيه زبناؤه الخليجيون، الذين كانوا يقطنون بإقاماته الخاصة بممر النخيل عبر عدة بوابات لايدخلها سوى من يتوفرون على تصريح خاص. البوليس كيلقى مشاكل باش يدخل ليها. دار دولة ديالو قدام اعين الدولة وبحماية شي وحدين فيهم كيف كيقول هو.
حتى فازمة كورونا استغلها باش يزيد يقوي امبراطوريتو. كارثة بكل المقاييس. فضيحة لدولة كلها امثال هادا فوق كلشي. كلشي تشكى. كلشي غوت. كلشي هدر وما تسوق لحتى حد. الحاج عندو حجاج قواديين من امراء السعودية وقادة جيشها. كلهم مراض ومكبوثين. وفصفحة مجموعتو العقارية كتلقاه كيهني رئيس الدولة بعيد العرش. وشوفو لعجب
