عفراء علوي محمدي- كود//

حكم القضاء الإيطالي فبلدة “سان فلانتينيو طوريو” على مغربي بالحبس عامين وربع شهور، بسبب سوء معاملتو لولدو الصغير، وعدم إنفاقو عليه، وذبح الحولي ديال عيد الكبير قدام عينيه، وهذشي خلاه يتصدم ويتخلع.

وحسب مواقع إيطالية، المحكمة الإيطالية صدرات هذ الحكم فحق المغربي (39 عام)، بعدما تقدمات مراتو الإطالية بشكاية ضدو، كتتاهمو فيها بأنه بزز الأب على ولدو الصغير يحضر للذبح ديال الحولي، بحجة أنه بغا يعلم ليه طريقة الذبح من الصغر، وهذشي خلا الولد يتخلع ويتشوكا من بعدما شاف الحولي مذبوك وكيتركل، ويهرب ويتخبا تحت الطابلة.

واتهمات الزوجة الإيطالية زوجها بعدم الإنفاق على ولدو اللي خلاه ميت بالجوع، وهذشي خلاها تطلب المساعدة من كنيسة مجاورة للدار باش يعطيوه ياكل، ومن ضمن الماكلة اللي قدمو ليها لحم الحلوف.

ومن بدما وكلات الأمر للطفل ديالها ديك الماكلة، حسب شكالة الإيطالية، دار الأب فضيحة فالدار، وغوت على مرتو حيت وكلات ولدهم لحم الحلوف، فالوقت اللي هو مكايصرف والو لا على ولدو لا عليها.