كود الرباط//

علمت “كود” من مصدر مطلع أن المرا للي شرات الدار لي كاريين إخوان ميكري، شراتها بثمن بخس مقارنة مع قيمة المنزل المتواجد في قصبة الوداية التاريخية، وهي القلعة اللي بنا أحد أقوى ملوك المغرب عبد المومن الكومي، مؤسس دولة الموحدين.

وحسب معطيات “كود” فإن هاد السيدة المسماة لبنى بنعبد الجليل، اقتنت المنزل سنة 2010 بقيمة 30 مليون، وهو ثمن بخس مقارنة مع قيمة المنزل المتواجد فوق أرض تابعة لملكية الدولة.

وقالت مصادر مطلعة على الملف، إنه عكس ما تم تداوله، فإن لبنى بنعبد الجليل عندها املاك فالولجة، وهاد المرا تاهي شدات العكس ومتفاهمتش مع اخوان ميكري لي دارو خطأ كبير فاش مشراوش الدار حيث ولفو 250 درهم للواحد كتجيهم فالكراء كل شهر.

دبا بجوجهم غالطين، ميكري لي كان عليهم يشريو الدار فوقتها وماشي يتعطلو كثر من 40 عام ويبقاو فوضعية كراء وكاينا هضرة بلي عندهم املاك فاكدال وسلا، والمرا تاهيا شادة العكس فاش مبغاتش تفاهم وتاخد دار أخرى من غير ديال ميكري. وهي عارفا بلي واخا تشري الدار فراه ممكن ف اي وقت تخرج منها بحيث الأرض ملك للدولة. هي عندها غير حق الزينة.

نهار تقرر الدولة تحتاج ديك البلاصة غادي تضطر تخوي السيدة الدار واخا شراتها، وطبعا غادي يتم تعويضها على ديك الدار.

“كود” اتصلت بلبنى بنعبد الجليل، لكن مكتجاوبش، فضلت تجاهل رسائل “كود” على الواتساب.

الوداية حسب مختصين فالثقافة والتاريخ، خاص ترجع منتج سياحي تاريخي ويدارو فيه عروض وامجاد المعارك الحربية الشجاعة لي خاضوها ملوك مغاربة بصمو فالتاريخ الانساني.