كود الرباط//

قالت مصادر لـ”كود” بأن عائلة إخوان ميكري، رفضو يهضرو مع الاعلام، مباشرة بعدما تلاقاو وزير الثقافة والشباب والتواصل مهدي بنسعيد. صحافيين مشاو معندهم ورفضو يهضرو مع الاعلام.

هاد العائلة دوزات مغالطات كثيرة على ديك الدار لي كاريين بـ500 درهم، وكاتجي لكل واحد فيهم 250 درهم للشهر. خصوصا بعدما وجهو اتهامات ثقيلة للعائلة لي شرات وشككو فالقضاء، اليوم هاد العائلة سرطات لسانها بعدما تلاقاو الوزير، في المقابل قالت عائلة بنت الوزير السابق لي شرات الدار بأنهم :”مبغاو والو من غير تطبيق القانون، وبغاو غير الدار ديالهم عبر تنفيذ الحكم ديالهم”.

العائلة قالت لقناة فاليوتيب بلي :”عائلة ميكري عندها املاك فين يمشيو، ومغاديش يتشردو، وحنا طالبين فقط تنفيذ الحكم القضائي”.

وحسب مصدر بجماعة الرباط لـ”كود” فإنه من حق الدولة تخرج اللي ساكنين فقصبة الوداية فحال كيش الوداية عندهم فقط حق الزينة وتعوضهم على الديور والاشجار ولي عندهم فوق الارض، بحيث أن ارض قصبة الوداية كلها تابعة للدولة.

قصبة الوداية كان كيسكن فيها السلطان عبد المومن بن علي الكومي (قبيلة كومي توجد نواحي تلمسان، وهو امازيغي) مؤسس الموحدين، ويعد ضمن الملوك الأربعة العظام في تاريخ المغرب، إلى جانب يوسف بن تاشفين، ماسينيسا، مولاي اسماعيل.

هاد القصبة ديال الوداية والاراضي لي حداها شراهم السلطان عبد المومن، وهاد الارض ملك للمخزن، والناس لي ساكنين فيها يملكون فوق الارض ولا احد يملك الأرض.