هند لكلاوي – كود ///

علمت “كود” ان مصالح الجمارك بمراكش نقدات 8 صقور مغربية من خليجي عندو الجنسية القطرية، كان باغي يهربهم اليوم الاربعاء 17 نونبر 2021 بمطار لمنارة ف جيت بريڤي.

وفق معطيات حصلت عليها “كود” فان هاد القطري كان غادي فرحلة خاصة فاتجاه مدريد، لكن الديوانة طلعو قافزين. قلبو لقاو صقور مهددة بالانقراض مديورة فصيكان ومخدرهم باش ما يديرو حس.

وقد تم تسليم هاد الصقور النادرة المهددة بالانقراض للمياه والغابات فيما تم فتح تحقيق تحت اشراف النيابة العامة مع الخليجي.

المثير فالعملية ان صحاب المياه والغابات وفق مصدر منهم، فراسهم اختفاء الصقور، وكيبحثو على متهم، لكنهم ما خبروش الديوانة بالقضية.

وحسب مصادر “كود” فخبرة الديوانة فرشات هاد التهريب.

ثمن هاد الصقور وفق مصدر “كود” كيوصل ل800 الف درهم.