كود هناء ابو علي ///

نهار خرج بيان الحكومة على رفع الحظر على التنقل الليلي مصادر فهاد الحكومة قالت ل”كود” باللي التيرانات والمهرجانات غاديين يبقاو غير مسموح للجمهور يدخل ليهم. يعني ان الموسيقي وحتى الكاباريات غادية ترجع. 24 ساعة ديال التلفة لكبيرة. حتى حد ما عارف اش واقع.
دازت ديك 24 ساعة وهو تخرج دورية من وزير الداخلية موجهة للولاة والعمال. دورية مختلفة فامور ومكملة لامور جات فبيان الحكومة. لا كاباري لا تيرانات لا مهرجانات.

صحاب الاستثمارات ديال الليل تلفو. فكازا التلفة مضاعفة. “كود” سولاتهم وكلهم ما عارفين اش يديرو. ما عارفينش حتى معاش يسدو. غير فكازا كاينة حاجة اخرى غادية تزيد تخربقهم. هي ريسطو “لوبيري” فلاكورنيش عين الدياب فكازا. ريسطو برادة وطاطا مرجانة. الريسطو الشهير اللي جاتو السلطة باش سدو كاع المطاعم وعاقبوهم وبان شي واحد كيقول ليهم هادا راه ديال السي برادة.

لوبيري” كيف كيتبين فيديوات خرجات ول البارح فيه الموسيقى وفيه الكونطرار اللي السلطات مانعاهم على كاع مطاعم كازا.

المهم صحاب مطاعم كازا اللي هدرات معاهم “كود” ما طالبينش يسدو لطاطا مرجانة. اللا. كيقولو لوزير الداخلية لوالي كازا للحكومة: عاملونا غير بحال طاطا مرجانة. هي القدوة ديالنا. بغينا كلنا نكونو بحالها. خليو لينا شوية الموسيقى ماشي طالعة بزاف بحال لوبيري وخليو لينا الكونطوار بالتباعد ولكن غير عاملونا كيف كتعاملوها

https://web.facebook.com/watch/?v=942075139739371&extid=NS-UNK-UNK-UNK-IOS_GK0T-GK1C&ref=sharing&_rdc=1&_rdr