كود فاس // تصوير: محمد الرشاشي//

والي جهة فاس مكناس، سعيد زنيبر، البارح الثلاثاء اهضر فالاجتماع الذي ترأسه لهجة شديدة وصريحة، خاطب فيها المهنيين وأصحاب المقاهي والمطاعم مختلف الوحدات الاقتصادية بالمدينة باش يلتزمو التدابير والإجراءات الاحترازية لمواجهة تفشي “كورونا” لكن هاد الفئة ممسوقينش كاع.

والوالي زنيبر خلال اجتماع للجنة اليقظة اهضر بلغة واضحة مع رجال السلطة والمهنيين اللّي كانو حاضرين، قال ليهوم بالحرف: “راه اللّي ملتزمش معانا غادي نسدو ليه، وهادشي مافيهش التساهل بشكل نهائي”.

تعليمات الوالي بان أن كُولشي ممسوقش ليها كاع. وكما رصدت عدسة كاميرا “كود” صباح اليوم الأربعاء (22 يوليوز 2020) مختلف المقاهي خدامين دون احترام التدابير والإجراءات التي فرضتها السلطات المختصة، ومن بينهم وضع الكمامات الطبية واحترام مسافة الآمان والتباعد الجسدي.

وعاينت “كود” مختلف المقاهي المتواجدة فوق النفوذ الترابي لمقاطعة أكدال خدامة بلا هاد الإجراءات بنسبة تجاوزت 90 في المائة، شأنه شأن مقاهي تقع فوق النفوذ الترابي مقاطعات زواغة وسهب الورد والمرينيين وفاس المدينة وسايس. يعني لمدينة كولها المقاهي ديالها خدامة بلا كمامات. الزبناء كالسين بلا كمامات وهادشي خطير بزاف.

الوالي البارح أكد أن كل باشا دار لجنة خاصة بيه، مؤكدا أن هاد اللجن بدات خدمتها البارح باش ترصد أي محل ممحترمش الإجراءات. دبا كولشي مابغاش يلتزم. نشوفو الكرة عن السلطة. نشوفو شنو غادي تدير معا هاد المحلات وكيفاش غادي تتعامل مع المقاهي اللّي فيها زبناء كالسين بلا كمامات. قضية أخرى لمقدمين راهوم عافين هادشي. خاص شي جهة تشوف هادشي بعينها بلا متخبر لمقدمين.