عفراء علوي محمدي- كود//
شيفور ديال الطوبيس مات، بعدما ضربوه الكليان فاش طلب منهم يديرو الكمامة، للحفاظ على سلامتهم من انتشار فيروس كورونا المستجد.
وقالا ماري بنت فيليب مونغي و، الشيفور اللي عندو 59 عام، أنه مات دماغيا مباشرة بعدما تم الاعتداء عليه فبلدة بايون، جنوب غرب فرنسا، فالسيمانة اللي فاتت، ومن بعد مات فالسبيطار، لبارح الجمعة، مللي قررات عائلتو توقف أجهزة الإنعاش.
وجوج رجال متهمين بشكل رئيسي فالقضية، والمدعي العام كيطالب بتعديل الاتهامات اللي تقدمات ضدهم، من بعد موت الشيفور.
ونعا رئيس الوزراء الفرنسي، جون كاستيس، الشيفور ديال الطوبيس فتغريدة ليه على تويتر، وقال “الجمهورية كتعترف بيه كمواطن مثالي، وماغتنساهش، واللي ارتكبو هذ الجريمة غادي يتعاقبو”.