سهام البارودي – كود///

الرسول صلعم كايقول ” جوج د الناس ماعمرهم كايتعلمو : المتكبر و الخجول” ! حنا اليوم دايرين بقوم ديال الباشار المتكبرين المعنتيين بالدارجة لي كايزيدو يكرسو الصورة ديال انه المسلمين ماكايحتارموش الحريات الفردية و ماكافهموش اصلا شنو هي الحرية ! و باغين يفصلو و يخيطو واحد “الحرية” سير موزير ! على قياسهم ( لي عاجباهم تدخل فنطاق الحرية و لي ماعاجباهمش تخرج من نطاق الحرية) واش ماشي قمة الجهل هادي ؟

شي بوهبوش نايضين دايرين حملات لمقاطعة فرانسا ! علاش ؟ قاليك حيت فرانسا أكدات على انها غاتستمر فعرض الرسومات و الكاريكاتورات على النبي محمد ! ايوا و من بعد آ سي الخرزي ؟ واش ماعارفش بلي من حقهم يعرضو الرسومات و الكاريكاتورات على الانبياء و على الله و على الرؤساء و على البابا و على المسلمين و اليهود و المسحيين ! فرانسا و بزاف د الدول المتقدمة راه ماعاطينش نفس القيمة لي عاطيها نتا الدين ! المدرسة الفرنسية ( مدرسة الجمهورية) باغا تربي ولادها على الحرية و على النقد و الدين بلاصتو فالدار نعاماس! باغاهم يتعلمو يفكرو و ينتاقدو و مايحطو تا سقف للانتقاد ديالهم و حتى الدين ينتاقدوه ! ايه آ سي الخرزي حتى الدين ! فرانسا عندها الحرية من الاسس لي كاتبنى عليها البلاد و هادشي علاش داك الاستاذ كان دار درس و قدم فيه كاريكاتور على الرسول حيت ففرانسا التلاميذ مستاعدين يشوفو كاريكاتور على الرسول و فيلم على عيسى و مسرحية على البابا و نكت على اليهود … و هانية حيت الحرية هي هادي ! و الدولة كاتفرض احترام الحرية بالقانون ! ماكاينش داك التغبان ديال انا مسلم ماتصوروش ليا النبي ديالي انا مسيحي ماتهضروش ليا على عيسى ديالي ! كلشي كايتضحك عليه و كلشي كايتنتاقد و كلشي كايتدارو عليه اعمال فنية ! و الحرية كاتبقا الفوق ! فوق منك و فوق من الحساسيات المفرطة ديالك و لاماعجباتكش المدرسة الفرنسية و القيم الفرنسية رجع تقود لبلادك راه فرانسا ماسيفطاتش ليك عودة عرگانة !

فرانسا لاكئية ! علمانية ! فيها القانون الوضعي لي داروه الناس و تافقو عليه فوق القوانين الالاهية لي نتا بوحدك باغي تفرضها ! القانون الوضعي ماكايعرف لا هذا مسلم لا هذا مسيحي لا هذا ملحد ! القانون كايعرف المواطن و كفى ! القانون الفوق ! و الدين لتحت ! و من القيم لي تبنات عليها الجمهورية الفرنسية هي الحرية ! حرية التعبير و حرية العقيدة و حرية الاختيار ! الحرية بمفهومها الشمولي ، الانساني ! ماشي ديك الحرية لي باغين نتوما تصنعوها بوحدكم ! واحد قاليك ” الحرية فيما يرضي الله” آ سير تكمش ! كاينة غا حرية وحدة ماكايناش مليون حرية !

و لكن هادشي طبعا صعيب على شي واحد مكسل ليه حمار فمخو يفهمو ! صعيب على شعوب مسيطرة عليهم الخرافة و الجهل انهم يفهمو شنو هي حرية التعبير !و هادشي علاش خرجو لينا بزاف ديال بوهبوش فوسائل التواصل الاجتماعي كايطالبو بمقاطعة فرانسا ! ماكاتحشموش ؟! واش هاداك وجهكم و لا گفاكم؟! فرانسا الانوار ! فرانسا الفلاسفة ! فرانسا المساواة و الحرية و الأخوة ! فرانسا الشريك الاقتصادي الاول للمملكة ! فرانسا لي كانتشاركو معاها التاريخ ايه التاريخ آ سي، علاش المغرب كانو فيه الادارات قبل ماتجي فرانسا؟ كانو المدارس ؟ الجامعات(ماكاندويش على الجامعات لي كايگلسو فيهم الطلبة على الحصاير) ؟ المعامل؟ كانو المستشفيات؟! فرانسا راه عاونات المغرب باش يأسس الدولة الحديثة ! فرانسا لي وفرات فرص شغل لشحال من حراگ مغربي و لي صوفات شحال من اسرة مغربية من الزلط! فرانسا لي كاتهربو لسفاراتها فاش كاتحسسو براسكم مهددين ! فرانسا الثقافة و العلوم و التيكنولوجيات ! رونو ! بوجو ! الطيارات ديال الاير بيس … فرانسا لابوراطوارات ديال الادوية صانوفي و سيرفيي و و و …. ! فرانسا الماركات الراقية للملابس و العطور !

هاد فرانسا كاااااااملة ! باغي نتا يا بوهبوش تقاطعها ماحشمتيش ؟! و هانتا قاطعتي فرانسا واش يصحابك راك قضيتيها زعما ؟! وا راه گااااع الدول المتقدمة اليوم كاتآمن بحرية التعبير و غدا و لا بعدو غايجي شي رسام بلجيكي يرسم كاريكاتور على الرسول ! و شي مخرج هولاندي يدير فيلم على الرسول ! و شي ممثل طالياني يلعب دور الرسول ! واش غاتنوضو تقاطعو الطاليان و هولاندا و السويد و فرانسا و بلجيكا …. و الدولة لي استعملت حرية التعبير تنوضو تجريو تلبسو صنادلكم و  تقاطعوها ؟ ايوا حررربش! قاطعوهم و بقاو بيناتكم غا نتوما و افغانستان شوفيا نشوف فيك آ طاجين الحوت و ديك الساعة شوفو منين تشريو الطيارات و التيجيفي و الفاكسانات و الطوموبيلات ! سيرو شوفو  مع شركات صناعة الطائرات فالسعودية و شركات صناعة الادوية فافغانستان و ليصونطر دابيل ديال ليبيا يجيو يستثمرو عندكم و يخدمو ليكم ولادكم و فاش تكونو باغين تحرگو شوفو شي فلوكة توصلكم لجبال طورا بورا!

آ خويا ماكاتمرگوووووووش ! و الله ماكاتمرگو من جهلكم و كالاخكم ! ماكاتمرگوش من تاهيماجيت ديالكم ! العالم كايتبدل حداكم و نتوما مازال باغين تجبدو السيوفة و تقطعو الريوسة ديال عباد الله حيت كاتختالفو معاهم فوجهات النظر !

لنقاطع فرانسا قاليك ! تا راه فرانسا لي خاصها تقاطعكم آ الظلاميين و تتهنا من الارهاب لي جاها منكم! يبقاو فيها غي الناس النقيين لي مستاعدين يندامجو و يتعلمو قيم الجمهورية.