محمد سقراط-كود///

كاين واحد النوع ديال الذكور المغاربة عندهم واحد الإحساس بالإظطهاد بالإظافة الى العدوانية إتجاه المرأة غير مبررة وغير مفهومة، خصوصا في بلاد محافظة بحال المغرب الراجل باقي يمكن ليه يتزوج ربعة دالعيالات بالقانون، ويمكن ليه ينعس مع وحدة وتحمل وتدير إختبار ديال الحمض النووي لإثبات النسب وماتصور والو حيت الولد للفراش وللعاهر الحجر، ويمكن ليه في الأعراف زوالتقاليد يغتاصب وحدة ويتزوجها وهانية ويتصالحو العائلات، ويمكن ليه في حالة كان جايب راسو وباغي يشوف وحدة غادا لليسي ويسيفط مو تخطبها ويزوجوها ليه هانية واش كتبغيه أو كتعرفوا وإرادتها وشنو باغا تدير في حياتها هادشي غير مهم وغير توافه الأمور، مادام فيه مواصفات الزوج الصالح وجا بالطريقة الكلاسيكية المحببة للأباء والأمهات، فراه مكاين فيه مايتفرض وكتلقى واليديها كيبززوه عليها بحال الى هوما لي غادين يحلو ليه رجليهم في تالي الليل وأول الصباح ومع نص النهار.

شنو لي مخلي واحد يمكن ليه يتزوج ربعة دالعيالات بالقانون في أنه يتبنى الفكر ديال الريد بيل ويظل النهار كامل في الأنترنيت كيحاول يقزم من النسا ويحدهم في الكوزينة لي غير معديين عليها أصلا، وشنو لي يخلي الرجل المغربي يحس بالمرأة كتهديد مباشر ليه ولمكانتو في المجتمع وهي الشهادة على وثيقة إدارية مادايزاش ليها في المقاطعة، ممنحقهاش تتجول في الفضاء العام كيف بغات و الوقت لي بغات، من غير نعيمة الجوك وبلا داك الهدرة ديال راهم كيخرجوا فين بغاو وكيمشيو فين بغاو والشارع عامر بيهم، للأسف تواجد المرأة في الفضاء العاد محدد بالجغرافية والزمن، عندها وقت محدد وبلايص محددين وفيهم ومكتحركش على راحتها، بينما الرجل الفضاء العام كلو ديالو يقدر يدير الرياضة الوقت لي بغا يجري يخرج يطج يحماق يسكر ويبول في الزنقة يدير رياضات فيها المغامرة، يدير البيكالة ويقطع بيها مسافات طويلة بين المدن وهانية مايهدر معاه تاحد هادشي كاين بنات كثار كيتمناو يديرو غير الربع ديالو.

ومع ذلك كتلقى شاب مغربي يالله فطماتو مو عوض يكون كيبغي النسا أو الرجال أو الحيوانات كتلقاه كيكره كولشي وباغي واحد النوع ديال النسا لي مفصلو غير هو في دماغو ولي في نظره خاص تكون خاضعة ليه غير حيت هو راجل، وكيدوز سنوات الشباب ديالو غير هاز هاد الحلم وكيدور بيه بين المواقع الزرقا، في المقابل كتلقى شرمول راكب على سي تسعين بلا كاريناج ومحسن الحسانة دبالوتيلي ومضبر على راس السوق وزاهي وعايش الحياة ومعمر تيك توك بالفيديوات هو والمريولة ديالو، بينما الآخرون يستعجبون دائما فشنو مكيعجب البنات في المشرملين وهوما ماقادرين يتشرملو ماقادرين يخلصو ماقادرين ينافسو في سوق البشرية بحتى شي إظافة أو مزية واخا غير تصرع طاجين وتعرف تشرب قرعة وتقدم الرفقة الحسنة، والنتيجة خطاب كراهية مبالغ فيه للنسا لي من المفروش يتبغاو زرافات زرافات.