كود علي الصافي العيون ///

رحل محمد الاغظف مدير قناة العيون ومؤسسها. اول قناة جهوية فمنطقة شاعلة. خدم مع شباب المنطقة فظروف صعيبة بزاف بميزانية مازالت ما ديرش ليك قناة قوية لقضية كتقول الدولة انها القضية الوطنية الاولى. غير فتجربة هاد القناة ما كانتش الامكانيات المالية كتبين باللي هادي قضية المغاربة الاولى.

المهم الاغظف اللي توفى قبل ايام فالهند ورسل ليه الملك محمد السادس تهنئة فيها اشادة بمهنيتو ووطنيتو واخلاصو لبلادو٬ كون جيل من ابناء المنطقة. فتح ليهم حلم. عرف كيفاش يدير توازانات فمنطقة حساسة جدا. توازنات قبلية وتوازنات بين الاجهزة…. وهاد الشي كولو خاصو يخرجو فقالب مهني ويواجه حرب مفتوحة من الجزائر والبوليساريو فالداخل والخارج.

دابا القناة خاصها مدير جديد. طبعا لا لعرايشي فيصل الرئيس المدير العام للشركة الوطنية للاذاعة والتلفزة اللي تابعها ليها قناة “العيون” ولا الدولة اللي هي اللي عندها الكلمة الاخيرة فاسم خليفة لغظف٬ تقدر تلعب بامر اساسي. وهو ان مدير القناة غادي يكون من المنطقة.

يستحيل يتقبل مدير من غير ولد التراب والا الامور غادية تعرف ظهور مشاكل كثيرة. فالمنطقة كاينة اسماء مرشحة لهاد المنصب. كاين اللي باغي يجيب شي صحافي من الاولى ولكن ولد المنطقة٬ غير هاداك مقدم الاخبار ما غاديش يزطط. صعيب عليه يدبر قناة ما عارف عليها والو.
كاين صحافيين بحال اهل البرا اللي كسب تجربة كبيرة فالخارج بعد تجربة ف”دوزيم”. هادا ممكن ينجح ايلى عطاوه الامكانيات. القناة قبل فترة كانت ميزانيتها 27 مليون درهم. رقم صغير بزاف يالله يكفي تشري الماتيريال وتخلص الصحافيين ودير شي امور بسيطة جدا. القناة خاصها 300 مليون درهم سنويا باش تكون قادة على تغطية قضية المغاربة الاولى وهي الصحراء.

اهل البرا ينجح ايلى جاب مدير معاه ولد المنطقة كذلك وخدمو كفريق اخر. لكن الاقرب الى الواقعية هو يجيبو صحافي من القناة تدرج فيها عارف تفاصيلها بحال شرف الدين او غيرو. اما ديك الاسماء ديال كتاب ومحللين راه غير التخربيق. راهم غاديين يديو القناة للحيط.

خاص ولد القناة اللي كان فيها او مازال ياخد المشعل ويكمل اللي بداه الراحل الاغظف ولكن خاص استراتيجية جديدة لعملها وبفلوس معقولة بمقر محترم. هاداك المقر راه ما يصلحش لقناة. خاصو يتغير كولو كولو

دابا ماشي لعرايشي اللي غادي يقرر. الدولة اللي خاصها تجيب اللي يصلح وخاص حتى لعرايشي يبعد من هاد السوق. طفرو حتى فالقنوات اللي كيسيرهم. السيد طول كثر اي مسؤول فمؤسسات عمومية فمنصب. عشرين عام راها بزاف وشوهة لبلاد باقي ليه غير يختار مدير “العيون”.