كود هناء ابو علي ///

شـفنا قبل ايام احزاب سياسية فالحكومة والمعارضة والممثلة فالبرلمان راسلات الاحزاب السياسية او ما سمته “القوى الحية” لانقاد العلاقات المغربية الاسبانية اللي عايشة اضطرابات كثيرة بسباب استقبال مدريد لزعيم البوليساريو ودخولو بباسبور ديبلوماسي جزائري وهوية مزورة لصبيطار ف”لوگرونو” باقليم الباسك فالشمال.

هاد البيان بغى القوى الحية تتحرك ضد دخول مغتصب ومتهم بالتعديب ضد مواطنين عندهم دابا الجنسية الاسبانية بل متهم حتى بالقتل. طبعا بغاو محاكمة ليه ووو

هاد العملية جات ضمن خطة طبعا ماشي مبادرة من الاحزاب. الخارجية بغات تركب عليها وتبان هي اللي كتوجه هاد لشي. بوريطة كيف العادة كيبغي يركب على كلشي. الساعة تكلف بتفاصيل تافهة وصافي. جهات اخرى فالدولة اللي تكلفات ونسقات مع الاحزاب لهدف نبيل وقضية المغاربة الاولى “الصحراء”.

ناس بوريطة بغاو يسوقو صحابهم فالاحزاب كيف دارو مع نزار بركة زعيم الاستقلال. كيفاش وحدة كانت خدامة مع البركة وجات للخارجية وتكلفات بربط الاتصال معاه مع الصحافة الاسبانية. هادا راه لحماق وصافي.

ما علينا من هاد الشي. نرجعو للخطة. بعد البيان كانت خرجات بعض زعماء الاحزاب فالصحافة الاسبانية وسالات بكل حزب مغربي يتاصل مع حزب قريب فكريا واديولوجيا ليه. شفنا مثلا رئيس الاحرار اتصل بزعيم الحزب الشعبي وشفنا امين عام حزب الاستقلال اتصل بدورو بنفس المسؤول.

شفنا التقدم والاشتراكية راسل الحزب العمالي الاشتراكي الحاكم وبوديموس =اليسار الراديكالي= وحتى الشيوعي. كانت عندو القضية قاصحة حقاش كيهدر مع وحدين “بوديموس” والشيوعيون الاسبان ضد الملكية ومع البوليساريو.

الاتحاد الاشتراكي حتى هو يقدر يتاصل باحزاب اليسار الوطنية والجهوية واخا كثير فيهم متعاطف مع البوليساريو.

البام ممكن حتى هو يتاصل او يراسل احزاب يسارية او سيوديدانوس =الوسط الليبرالي=

دابا بقى غير البي جي دي اللي ما عندو مع من يتاصل. كاين حزب يميني متطرف حتى هو كيآمن ببعض الافكار بحال البي جي دي وهو “بوكس” ولكن واش يقدر يديرها؟ موحالش.

المهم المغرب دار خطة كتبين باللي ما غاديش فاتجاه عدم استدعاء سفيرتو اللي فمدريد على الاقل فالايام القليلة. دخل للمجتمع للاحزاب الاسبانية باش يسوق قضية ما عندهاش متابعة اعلامية خاصة فالاعلام السمعي البصري. اسبانيا واحلة غير مع كورونا ومشاكلها. نساتهم مشاكل بحال غالي وانعكاساتها الخطيرة علي العلاقة مع المغرب.