أسماء غربي – كود///
آمنة ماء العينين ديال البيجيدي ستاهلات أنها تكون شخصية الاسبوع على “كود”، حقاش خلقات واحد النقاش كبير بين جميع الأطياف.
النقاش لي تخلق على ماء العينين، ماخلقوش شي حدث من غير علاقة الشوباني مع مرات صاحبو، وبينما كانوا ناس كيمشيو فالطرح ديال الصور مفبركة، فهادشي ماخلاش النقاش يوقف، وكاين ناس لي رفعوا فوجهها شعار “لا تنهى عن أمر وتأتي بمثله…عار عليك إن فعلت عظيم”، وشق آخر كيقول أنه هاديك حرية شخصية ومن حقها دير لي بغات بشرط أنها ماديرش علينا التقية، بينما المدافعين على ماء العينين كيقولو أن هناك أيادي خفية باغية تحطمها وهادشي كيبان حتى فعدم تضامن قيادات من الحرب معها.
طبعا لو كانت ماء العينين فشي جماعة أو حزب ماشي حاكم تا حد مايتسوق ليها واخا تمشى عريانة، والدليل أنه بزاف دالمغربيات كيخرجو من دارهوم دايرين الجلابات وكيوصلو لدار صاحبهوم كاطير الجلابة وكيبقى غير الميني ديال السهرة، ويقدر يكون هادشي ماشي بيد ماء العينين كيف ماشي بيد ديك لبنات لي كارهين الجلابة وماباغيينهاش ولك مفروضة عليهم.
