الرئيسية > تبركيك > شخصيات ماركاو 2021.. الرميلي أول مرا عمدة لكازا اختارت تدبير شؤون مدينتها على منصب وزاري وتحملات مسؤولية كبيرة فعز جايحة كورونا
01/01/2022 20:00 تبركيك

شخصيات ماركاو 2021.. الرميلي أول مرا عمدة لكازا اختارت تدبير شؤون مدينتها على منصب وزاري وتحملات مسؤولية كبيرة فعز جايحة كورونا

شخصيات ماركاو 2021.. الرميلي أول مرا عمدة لكازا اختارت تدبير شؤون مدينتها على منصب وزاري وتحملات مسؤولية كبيرة فعز جايحة كورونا

عمر المزين – كود //

خلال عام 2021 برز إسم نبيلة الرميلي بقوة عند عامة المغاربة خاصة مللي تعينات وزيرة الصحة والحماية الاجتماعية، قبل أن يتم إعفاءها وتعيين مكانها خالد آيت الطالب.

نبيلة الرميلي هي بنت كازا وخريجة كلية الطب وخدمات طبيبة فمدينة وزان مابين 2002 و2005، ومن بعدها السيدة شقات طريقها المهني وتعينات مديرة إقليمية للصحة فعدد من المناطق فكازا بحال بن امسيك وآنفا، قبل أن يتم تعيينها مديرة جهوية للصحة فجهة كازا – سطات.

دارت هضرة كثيرة ونقاش على سبب إعفاء الرميلي من منصبها كوزيرة للصحة بعد أسبوع فقط من تعيينها لكن بلاغ الديوان الملكي كان واضح وأكدت الرميلي بنفسها ما جاء فالبلاغ اللي أكد أنه باقتراح من رئيس الحكومة، تفضل سيدنا بتعيين خالد أيت الطالب وزيرا للصحة والحماية الاجتماعية، خلفا نبيلة الرميلي طبقا للفصل 47 من الدستور.

هاد الإعفاء جا بعد ملتمس تقدمات بيه الرميلي نفسها قصد التفرغ الكامل لمهامها كرئيسة لمجلس مدينة الدار البيضاء، بعدما تبين ليها الحجم ديال الخدمة اللي كتسناها فهاد المهمة التمثيلية، وما تقتضيه من متابعة مستمرة لقضايا سكانها وللأوراش المفتوحة بهذه المدينة الكبرى، مما سيؤثر على الالتزامات الكثيرة والمواكبة اليومية التي يستوجبها قطاع الصحة، لاسيما في ظروف الجائحة، كما جاء في بلاغ الديوان الملكي.

عزيز أخنوش رئيس الحكومة كان دافع على الرميلي بعد هاد الإعفاء، وعبر عن افتخارو بها ككفاءة وطنية وقال باللي هي بينات على حسها الوطني العاليورغبتها في خدمة الكازويين والكازويات على أكمل وجه دون تقصير فحقهوم. يعني السيدة سمحات فالوزارة على قبل التفرغ و التركيز على حل مشاكل كازا لكبيرة واللي بداتها شويا بشويا وخا أمامها عمل كبير وشاق لكن لمرا قادة وغادية فخدمتها مزيان.

الرميلي القيادية في صفوف حزب التجمع الوطني للأحرار كانت قد انتخبت بأغلبية ساحقة كرئيسة لمجلس جماعة كازا وطيحات الـ”بي جي دي” من الرئاسة. وكتعتابر هي أول مرا عمدة بالعاصمة الاقتصادية للمملكة.

كان عليها ثقل كبير وشاق فوقت الجايحة وفأكبر بؤرة وبائية كانت فالمغرب. خدمة ليل وانهار لمواجهة وباء عالمي خرج على كلشي ودمر قطاعات كبيرة. كانت نجحات فهاد المهام وتعتبر من أبرز الوجوه اللي واجهات الجائحة ودبرات المرحلة فكازا اليي كتعتابر من أكثر المدن تضررا بتداعيات هاد الأزمة.

الرميلي مرا من بين العيالات المغربيات اللي كيستحقو يكونو من الشخصيات اللي تميزو فعام 2021.

موضوعات أخرى

28/03/2024 15:30

بوليس سيدي قاسم شدو 4 فيهم واحد قاصر بانو ف فيديو هازين السيوفا وكيسبو فمؤسسات وموظفين عموميين وكيحرضو على تنفيذ اعتداءات

28/03/2024 15:20

الريح قوية مع الغبارية .. وزارة التجهيز: الشيافر فهاد المدن يردو بالهوم مزيان فالطريق

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:22

تعيينات جديدة فمناصب عليا دازت اليوم فمجلس الحكومة: منهم مدير المحروقات ومدير الموارد البشرية فوزارة الخارجية

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد