ملف الطبيب التازي : مرافعة الوكيل العام تقول ان جناية الاتجار بالبشر كينا
عفراء علوي محمدي- كود//
تقارير كثيرة فالغرب تناولات موضوع تسجيل أول فاكسان ضد كورونا بسخرية كبيرة، علماء ألمان وميريكان عتبرو ادعاء فلاديمير بوتين، الرئيس الروسي، مجرد “تهور وحماق”، وبللي حديثو على اللقاح الجديد وبأن روسيا فازت فسباق لقاح “كوفيد 19” هو ادعاء “ماشي أخلاقي”.
اللقاح الروسي، “سبوتنيك الخامس – Sputnik V”، كيعتمد على الفيروس الغدي، وهو واحد من العوامل الممرضة اللي كسبب نزلات برد أو أمراض أخرى، كيمكن هندستو مع التسلسل الجيني للفيروس التاجي المسبب لمرض “كوفيد 19″، باش يقاومو من بعد ما كيتم حقن الشخص بيه.
وكيشوفو العلماء بللي الحقن اللي صوبات روسيا مازال خاصها تتجرب، والادعاء بأن هذ الحقنة، اللي جرباتها بنت بوتين براسها، فعالة وماعندها حتى آثار جانبية ماعندهاش بيانات علمية يمكن الاستناد عليها.
بينما العلماء الالمان استغربو كيفاش زربات روسيا على هذ اللقاح باش تسجلو، فالوقت اللي فأوروبا مكيتم الموافقة على شي لقاح حتى كيدوز من مجموعة من التجارب الإكلينيكية الكاملة.
ال بروفيسور داني التمان، أستاذ علم المناعة في إمبريال كوليدج بلندن قال إن “المعيار مرتفع بالضرورة” للموافقة على اللقاحات، وقال أنه من الممكن يكونو عندو اضرار جانبية كبيرة.
وشي وحدين تساءلو واش يكون هذ اللقاح روسي فعلا، وإلى كان روسي فوقاش تصايب، حيت سمعو أنه تعطا قبل للرجال السلطة فالبلاد وصحاب النفوذ والنخب السياسية، وتحديدا فشهر أبريل.
ومنظمة الصحة العالمية قالت بللي جميع اللقاحات المرشحة خاص تدوز من مراحل اختبارية قبل ما تتطرح.
وكانت المنظمة حثات روسيا، السيمانة اللي فاتت، على اتباع الإرشادات المعمول بها، وتدوز من مجموعة من المراحل قبل ما تطور فاكسان آمن.
ولحد الآن، كيتم تطوير ازيد من 100 فاكسان ضد كورونا عبر العالم، غير 3 منهم اللي وصلو للنرحلة الثالثة من الاختبارات.