سهام البارودي – كود//

الخوانجية و السلفيين و الظلاميين دايرين هاد الايام حملة ايليكترونية ” لا لإغلاق المساجد” “افتحوا مساجدنا” “أحن إلى مسجدي” و عاطينها للشكا و البكا فحال شي رباعة ديال الهجالات و كاين فيهم لي كايخشي وسط هضرتو بعض التهديدات للدولة على اساس انها فاش كاتسد المساجد فراها كاتقيس الأمن الروحي و كدا كداشي راكم عارفين ديك القاعيدة ديال للتقلاز تحت الجلابة !و لكن هيهات هيهات !آ و الله واخا تزحف على ترمتك!  سامارش با كوم صا مونامي!

اولا اذا كان خاص الدولة تسد المساجد فراه خاصها تسدهم هادي مسألة لا نقاش فيها ! اذا الوضعية الوبائية تستدعي الاقفال فأنا كمواطنة مغربية غانبغي الدولة تسد المساجد كيما سداتهم العام لي فات و ماوقع والو بالعكس الناس مارسات الشعائر ديالها فالدار في هدوء و اطمئنان و تفادينا دوك التجمعات لي كايكونو فالليل و داك الصداع و الاكتضاض فالطرقان و الشوارع و بالعكس كان حسن رمضان بالنسبة ليا شخصيا و حسيت بالاجواء الرمضانية ديال بصح السكات و النقا و الراحة النفسية! راه ماشي بالضرورة يتحلو الجوامع باش نكونو مسلمين و نبانو مسلمين ! و ماشي بالضرورة تخشي ديك الصلاية تحت باطك و مك دي معاها داك الكرسي ديالها د الحمام للجامع مورا الفطور باش تتسماو صليتو! الصلاة كايمكن تمارسها وسط دارك ايوا لاش كارع لينا الفر ؟!

راه الوضعية الوبائية ديال البلاد هي لي كاتحدد واش تسد الجامع و لا البيران و لا المارشيات … و فهادشي كايتساوا كلشي ! كي الجامع كي القهوة ! اي بلاصة كايتجمعو فيها عباد الله كاتولي عندها احتمال انها ترفع عدد الحالات خاصها تتسد ! حيت الجامع مافيهش شي حاجة سبيسيال تقدر تخلي عباد الله ماتمرضش بكورونا ! راه لاماتعقمش بيد الانسان و كان فيه التباعد و احترام الاجراءات الوقائية احتمال كبير انك تلعقها فيه.

المدارس بجلالة قدرها و تسدات واحد الوقت ! و البيران و القهاوي و الكاباريهات و المحلات التجارية و الكوافورات و الحمامات و سدات فاش كان خاصها تسد ! معاها تقودات على اسر كثيرة كانت معشة من هاد القطاعات. شحال مخدمة من اسرة و محركة عجلة الاقتصاد فالبلاد… هادشي كلو نهار كان خاصو يتسد راه تسد. علاش الجوامع خاصها تكون استثناء. داكشي لي كايدار فيها يقدر يدار ببساطة فالدار وحتى حاجة ماغادي تتغير.

شي ظلاميين كايكتبو على اقفال المساجد فحالا كايدويو على طرد الموريسكيين من الاندلس و “اللهم انا نشكوا اليك جلد الفجار ” تاشمن فجار كادوي عليهم آ ولد الحمقة ؟! محارب مع الكاثوليك ؟ راه غي بلادك هادي ! فيها وباء خطير و ظهور سلالات جديدة خاص الدولة تتعامل مع هادشي بحذر باش تحميك و تحمي المواطنين الآخرين و لا كنتي نتا احمق مسطي عندك نزعة انتحارية الدولة ماخاصهاش تكون حمقة فحالك! يا الله سير مسح خنونتك و تسنا البلاغ الرسمي و باراكا من التبوحيط!