سهام البارودي – كود//

ماكايعجبنيش سعيد الناصري ! كانحس بيه غير صادق مع راسو  كفنان من نهار شفتو كايحتج على “الرداءة” ديال المنتوجات الفنية الرمضانية فحالا هوا كان كايخرج منتوجات افضل منها ! داير الرداءة واجهة باش يضارب على حقو فكيكة ديال الدعم القنوات العمومية و مارضاش حيت ساعتو سالات فيها و بانو وجوه جديدة ! السيد كايهضر بواحد التعالي ! فحالا بوحدو لي كاين و بوحدو لي خاصو يكون !
الناصري l’omniprésent ، l’omnipotent ! فعوض انه يسلم المشعل للجيل الجديد ديال وليدات الوقت و يقبل بلي سي لا فان مونامي!

الحاجة الثانية لي ماكانحملهاش فيه، هي هواية الركمجة لي كايبدع فيها ! الناصري كايموت على دور سبرطاكيس محرر العبيد ! كايبغي يركب على ديك ” ولد الشعب” و ” الشعب” و كايعاود كلمة ” الشعب” بزاف فهضرتو باش يكسب التعاطف ديال الأغلبية ! فحالا الانتاجات الفنية لي كايديرها راه كايديرها فابور فسبيل لله لعباد الله و هوا سوا دارها مع قناة عمومية سوا دارها مع قناة خاصة راه رابح فيها گرمومة صحيحة !

ولكن هادشي مامنعنيش اني نعطيه فرصة و نتفرج فالسلسلة ديالو الجديدة ” البوي” من باب الانصاف السيد خصوصا انه قاد حملة اعلامية قوية كبيرة قبل عرض السلسلة (واخا ماعنديش من بنادم لي كايموت على دور الضحية) !  و فعلا تفرجت فيها و الحلقة الأولى كانت كافية باش يبانو ليا الملامح ديال العمل الفني الجديد.

كيما العادة لا جديد تحت الشمس ! سعيد الناصري في الدور الأبدي ديالو ! واخا السيد موسطاشو شاب و كرشو دلات و مركب فم ! مازال مصر يلعب الدور ديال الشاب الثلاتيني الفقير الشهم البطل لي عندو الديبلومات و لي كايعاني من البطالة ( البطالة القديمة ديال ما قبل ظهور ليسونطر دابييل فالمغرب) و لي بطبيعة الحال كايمشي يخدم عند شي عائلة لاباس عليها و كايعتقها حيت هوا شهم و بطل و … في انتظار تزعط فيه شي تيتيزة لاباس عليها فهاد المسلسل فحال لي كايتزعطو فيه گاع التيتيزات لي لاباس عليهم فگاع الأعمال ديالو!

الحلقة الأولى ديال السيتكوم هي كوبي كولي سلسلة ميريكانية سميتها who’s the boss ! ماشي ” اقتباس” كيما كايقول الناصري و إنما كوبي كولي للحلقة كلمة بكلمة! المجهود الوحيد لي مديور فيها هوا الترجمة للدارجة اما حتى المواقف و الشخوص راهم هوما هوما و طبعا فيها ديك لاتوش ديال سعيد الناصري محرر العبيد كاينة و ديما كايصر فالأعمال ديالو الفنية يهضر على  الثنائية ديال لي لاباس عليهم (المرفحين) vs الحازقين ! و كايصور  ديما الحازقين على اساس زويونين و ظريفين و فيهم شهامة و عزة نفس و لي لاباس عليهم شفارة و لا مبهلين ! و داك الديسك القديم ديال لي لابس گرافاطة شفار و لي لابس الشراوط ولد الناس بلا بلا بلا…

و حيت خاصو يطلع واكل و ينزل واكل ! ضروري من بعض الايحاءات “السياسية” زعما شوفوني آرتيست أونگاجي كانلوح ميساجات للسياسيين و المسؤولين !

الحاصول لقيت راسي واخا عطيت فرصة لهاد العمل الجديد إلا أنه سعيد الناصري مابغاش يعطي لراسو فرصة و يخرج من قوقعة التكرار و “كوبي كولي” و يغطي على غياب “الفكاهة” فسلسلة “فكاهية” بممارسة الركمجة ! و الطامة الكبرى هي هاد ” الاقتباسات ” لي ماكايساليش منها هاد السيد ! علاش غادي ” تقتابس” من ميريكان ياك تا مبدع ؟! وا بدع نشوفو !