الرئيسية > آراء > ستة ديال النقط كايبينو شحال غاتكون الحياة كئيبة كون كنا كاملين كانعيشو كيف بغا لينا نعيشو مول الفوقية ! لا غنا ! لا عيوط ! لا طقطوقة ! لا عيالات زوينات فالزنقة ! لا بحر و برونزاج ! لا سهرات لا حيوح ! والو غانبداو نشربو غا اتاي فالغابة و نبردو على راسنا بديك ” الدين ليس الابتعاد عن الحياة”
06/03/2021 15:00 آراء

ستة ديال النقط كايبينو شحال غاتكون الحياة كئيبة كون كنا كاملين كانعيشو كيف بغا لينا نعيشو مول الفوقية ! لا غنا ! لا عيوط ! لا طقطوقة ! لا عيالات زوينات فالزنقة ! لا بحر و برونزاج ! لا سهرات لا حيوح ! والو غانبداو نشربو غا اتاي فالغابة و نبردو على راسنا بديك ” الدين ليس الابتعاد عن الحياة”

ستة ديال النقط كايبينو شحال غاتكون الحياة كئيبة كون كنا كاملين كانعيشو كيف بغا لينا نعيشو مول الفوقية ! لا غنا ! لا عيوط ! لا طقطوقة ! لا عيالات زوينات فالزنقة ! لا بحر و برونزاج ! لا سهرات لا حيوح ! والو غانبداو نشربو غا اتاي فالغابة و نبردو على راسنا بديك ” الدين ليس الابتعاد عن الحياة”

سهام البارودي – كود//

تخايلو معايا كون تحقق حلم مول الفوقية و صحابو و ولينا كاملين عايشين ديك الحياة كيما كايتخايلوها لينا :

اولا بعدا غي نساو شي حاجة سميتها العيالات فالفضاء العام ! حيت دابا كاتخرج كايبانو ليك العيالات منورين الزنقة خصوصا فالاحياء الراقية لي يمكن العيالات يمارسو فيهم الحرية ديالهم ! لاتمشيتي فأگدال مثلا و لا انفا و لا گيليز غايبانو ليك العيالات كي الوريدات ! ها مولات الصاية غوز ! ها مولات الدجين ! ها مولات الشعر قصير ! ها مولات الشعر طويل ! ها مولات الجليليبة ! هادي طبيبة ! هادي استاذة هازة المحفظة ديالها ! هادي ربة بيت ! العيالات كي الوردات ها لي غادية لخدمتها ها لي جالسة فالقهوة ها لي سايگة طوموبيلتها ! كاتخرج كاتحس بالتنوع كاتحس بالانوثة كاينة ! كادوز من حداك شي مرا دايرة شي بارفان زوين كاتشم ريحة زوينة كاتفرحك ! ايوا هادشي و الله لا حلمتي بيه آولد عمي كون كنا عايشين فحالي بغا لينا مول الفوقية نعيشو ! الشعر مطلوق ! حرااااام ! الصاية ؟ حراااام! الدجين ؟ حراااام ! جالسة كاتقهواي بوحدك ؟ حرااااام ! دايرة شي بارفان ديال إيڤ سان لورون ؟ حراااام ! كلشي العيالات يماهم خاصهم يتحجبوا و كلشي العيالات يماهم خاصهم يديرو النقاب و نبداو ندورو فالزنقة كي الاشباح جنب الحيوط كلشي لابس نفس اللبسة ! كلشي طالي نفس اللون فحال النموذج لي عاش فيه مول الفوقية فالسعودية! اوريلي الالوان و العطور و اللبيسات الزوينين فالفضاء العام ! اوريلي الانوثة! اوريلي الجمال ! غاتبدا تسارا فانفا و لا اگدال فحالا كاضور فقندهار غي بوقلوة ناشر باقلو وسط القشاشب  و غادي ! شي كايخنزر فشي! و العيالات ؟ اختاه موتي!

و دوك البلانات ديال تمشي للبحر و تجلسي تبرونزاي مع راساتك بالدوبياس ! غي نساي اختاه ! واش تسطيتي ؟! مول الفوقية راه كايشوف الدوبياس كايبان ليه الحوا كايبان ليه الفسق كايبان ليه الفجور كاتبان ليه الفتنة كايبان ليه الزنا صافي داكشي اوطوماتيك عندو فدماغو فحالا وركتي ليه على شي بوطونة و طلقتيه فحال دوك المونيكات لي كايتعمرو ! والو ماكايناش عندو ديك القضية ديال ا حقا لبستي دوبياس بغيتي تبرونزاي و صافي فحال فاوروبا و امريكا و الدول المحترمة لي بنادم عندو عقل ماشي حمار مكسل ليه وسط راسو ! لا لبستي الدوبياس يعني العهر و الفساد و الديوثية صافي سدينا و سيري تموتي.

ثانيا : لاعشنا فحالي باغي لينا مول الفوقية نعيشو غا نسا آ ولد عمي شي حاجة سميتها الموسيقى و الطرب و المواويل ! ماكاين غا الاناشيد الدينية و يا طيبة يا طيبة يا داوا العريانة ! و النهار الكبير گاع غاتسمع فيه دوك الدياسك ديال مجموعة الشروق للسماع و المديح ! والو ماكاينش داكشي ديال اليوم تشهيت نسمع لعبد الهادي بلخياط ! غدا نعيمة سميح !بعدو  عبد الحليم حافظ ! ام كلثوم ! ستينغ ! مامي ! خالد ! گناوة ! العيوط بصوت ولاد البوعزاوي ! حجيب ! الصنهاجي ! الطقطوقة ! الروايس ! الروك !  لا والو مع مول الفوقية غانضربو على شي حاجة سميتها الموسيقى ! غانساو شي حاجة سميتها الثرات و الفولكلور المغربي الغني و المتنوع و غانبداو نسمعو كااااملين بينا لنفس الاناشيد الدينية الرتيبة و المملة و نعرسو بطلع البدر علينا!

ثالتا: البرامج الترفيهية و الحفلات و المهرجانات ! نسا آ ولد عمي ! مول الفوقية ماكرهش التلفزة يبداو يدوزو فيها غي البرامج الدينية ! اما شي نقل ديال السهرة ! شي نقل ديال شي فيستيڤال ! شي برنامج ترفيهي غي نسا ! بالنسبة للمهرجانات هادوك ماعمرك تحلم بيهم يجيبو ليك شي روك سطار و لا شي معني كبير و لا ! لا داكشي كلو حراااام ! غاتبدا تشوف غي المهرجانات ديال تجويد القرآن الكريم و كفى به نعمة

رابعا : مابقا مايتخبا !  اي نوع من انواع الفن من غير الموسيقى غالبا بلا ماتحلم بيه ا ولد عمي ! غي سير الله يسامح لا سينيما لا مسرح لا اوركيستر فيلارمونية لا جذبة! حرااام ! نيتفليكس ايجي بيست حراااام ! الروائع د السينيما حرااام ! داك المسرح لي يا الله كمل فالرباط غانسدوه حيت حرام و مضيعة للوقت و بدعة و كل بدعة ضلالة بلا بلا بلا …

خامسا : آش غانقوليك آولد عمي ! النكت لي هوما ابسط حاجة كايرفعه بيها الانسان على راسو تاهي غايدخل ليك فيها مول الفوقية ! و غايقوليك لا هادي حلال ضحك عليها و هادي حرام ضحك عليها ! و لا هادي فيها كلام اباحي و لا هادي نكتة على الجنة و الملائكة و كدا … تا الضحك و الكوميديا غايحماضو و غانوليو كاملين خاصنا نضحكو على دوك النكت الحااامضة ديال با العلوي !

سادسا : البيران، الكبريهات، ليبواط ! هادوك طبعا غايكون دازت فوق منهم الدكاكة و تردمو ! حيت بالنسبة لمول الفوقية هادوك ماشي اماكن ترفيهية الانسان يمكن يمشي ليها ينشط مع صحابو و لا صاحبتو و لا مراتو و يشطح و يفوج و يشرب كاس و يرتاح ! لا مول الفوقية بداك الراس لي عندو لي مشارجي بالافكار الجاهزة كايشوف فدوك البلايص اماكن فساد و رذيلة ! و انه مستحيل تمشي تسهر تما و تخرج ترجع لدارك طرونكيل ! لاهوا بالنسبة ليه گاع القصاير و السهرات كايساليو بالكسايد و الآفات و العاهات فحالا الدول لي عندها هادشي عادي و عايشة بيه مافاهميش تاخصية و مول الفوقية بوحدو لي فاهم!

شفتي شحال غاتكون الحياة كئيبة يماها لا تحقق حلم مول الفوقية و عشنا كي كايتمنى لينا هو نعيشو ! قهرة و ملل و زمت و كبت! كلشي لابس نفس اللباس كلشي كايسمع لنفس الاناشيد الدينية ! لا تفواج ! لا موسيقى ! لا انوثة ! لا فن لا ابداع ! واش لي باغي يسلب منك حرية التعبير ! باغي يسلب منك حرية الفكر و النقد و الشك غايدير فيك الخير آولد عمي ؟ غاتعيش معاه الحياة ؟

و غايحيد ليك هادشي كامل و غايقوليك هادشي راه ليس الابتعاد عن الحياة ! وا تا فيناهي الحياة بعدا ؟! راه ليس بأتاي بالشيبة و ماتش فالحمري وحده يحيى الانسان !

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه