عفراء علوي محمدي- كود//

خرج رضوان السملالي، رئيس جمعية المصحات الخاصة بالمغرب، بتصريحات كيقول فيها أن كل مريض بفيروس كورونا المستجد كيكلف المصحات الخاصة 8000 درهم يوميا، فالوقت اللي الوكالة الوطنية للتأمين الصحي حددات لائحة تسغيرات معقولة ديال الطريطمون فالكلينيكات، وحددات ثمن علاج المريض اللي فوضعية حرجة فالإنعاش ف1500 درهم لليوم الواحد.

“كود” تواصلات مع السملالي باش يوضح فكرتو أكثر، وكيفاش ممكن المصحات يخسرو هذ القدر الكبير ديال الفلوس بالنبة لمريض حالتو مستقرة أو خفيفة ومايحتاجش إنعاش، فقال أنه قصد الناس اللي تقاصت بالفيروس بنسبة 70 فالمية، ودخلو للإنعاش، واعتبر أن 1500 درهم هي تسعيرة قليلة بزاف.

وزاد: “هذ الثمن اللي حددات “لانام” ماكافيش تقنيا، وراه اجتمعنا مع وزير الصحة خالد آيت الطالب وحكينا ليه الإكراهات اللي عندنا، وأن أجهزة إنعاش مرضى “كوفيد 19″ كتتطلب أكثر ومايمكنش نخفضو الثمن، وهو الشيء اللي تفهمو الوزير بحكم انه على دراية كبيرة بهذشي”.

وقال أنه واخا اليوم جور فيرري، جمعية المصحات الخاصة ماكَلساتش، بل دارت اجتماع لتدارس هذ المشكل، استعدادا للاجتماع اللي غتعاود تديرو مع وزير الصحة فبداية الأسبوع المقبل، لاقتراح تعريفة جديدة خاصة بمرضى “كوفيد 19″، كتنسجم مع الإمكانيات المتاحة.

وبشأن صحاب الكلينيكات اللي كيطلبو أثمنة كبيرة من أجل علاج مرضى “كوفيد19” واخا فحالة طفيفة، قال أن الجمعية كانت هي اللولة اللي طلبات باش يكون التفتيش ديال المصحات، وقامت من جهتها بالتفتيش والفاكتورات، لكنه اعتبر فالمقابل ان مواقع التواصل الاجتماعي “كتزيد فيه”، واللي عندو شي دليل على أن شي مصحة زادت عليه الفلوس يمكن لو يجبدو بالوثائق والفاكتورات، وهوما يديرو خدمتهم فالجمعية باش يتابعوها ويوقفوها عند حدها.

وشاف أن فهذ الأثمنة المرتفعة “استغلال للجايحة اللي كيعيشوها المغاربة”، ومايمكنش الجمعية تقبلو، “راه حتى حنا عندنا واليدينا يمكن يمرضو وولادنا وخوتنا وخواتاتنا”، كيف قال.

وبالنسبة للناس اللي ماعندهومش، قال السملالي أنه خاص الدولة تتدخل وتلقى حلول لهذ الفئة، ويكون تحمل من طرفها، والأمر بيد الدوائر الحكومية ووزارة الصحة ووزارة المالية، حيت غير القطاع الخاص اللي خدام دابا والقطاع العام عمر ورجع لور ومابقاش قادر يدخل الناس مازال لأقسام الإنعاش، وكشف أن 50 فالمية ديال الناس اللي فالإنعاش كاينين فالبريفي.

لأخخذ الرد ديالو، حاولات “كود” تتواصل مع مدير الوكالة الوطنية للتأمين الصحي، اللي حددات أسعار العلاجات ديال كورونا، باش تعرف الرد ديالو على هذ الكلام، لكن هاتفو صونا بلا جواب، كيف تواصلات مع المكلفة بالتواصل اللي خبراتنا انه صعيب شي مسؤول من الوكالة يعطي تصريح اليوم، بحكم انه جور فيريي.