گود جرسيف//

واحد القرار غير مبرر وما مفهومش خذاتو وزارة الداخلية كايخص اقليم جرسيف، وحتى واحد ما عرف المبررات ديالو..

القرار هو إعادة واحد الموظف كان مسؤول على قسم الشؤون الداخلية بعمالة جرسيف، باش يشرف على الانتخابات الجزئية، من بعد إلغاء نتائج الانتخابات التشريعية الخاصة لجرسيف، اللي شابتها خروقات.

المهم هاد الموظف اللي كيعرف الكبير والصغير آش دار في عمالة جرسيف، واللي حركات التنقيلات الأخيرة عاقباتو وتمات الدحرجة ديالو من مسؤول الشؤون الداخلية إلى رئيس دائرة، وتم القذف به إلى إغرم، رجع “هدد وتوعد” المسؤولين بالعمالة، وقال ليهم “يا إما تردو ليا الاعتبار ديالي يا إما نفضح كلشي”، ومن بعد ذلك وبغرض الإرضاء ديالو، قالوا آش نديرو نردوه يشرف إلى الانتخابات الجزئية اللي غادي تدار بتاريخ 29 شتنبر باش يسكت.

وتدارت مراسلة لوزارة الداخلية ورجع باش يشرف على انتخابات كان مسؤول على فشلها وإعادتها..

هاد القرار أثار استغراب موظفي العمالة، لأن قسم الشؤون الداخلية بجرسيف تعين فيه إطار جا من مراكش واللي عندو تجربة كبيرة وما غاداش تغلبو انتخابات جزئية بإقليم جرسيف.

دابا واش هاد الشي فخبار وزير الدخلية عبد الوافي لفتيت، ولا غير مسامر المايدة اللي ورا هادشي؟