نجوى المالحي-كود//

بدون مقدمات، وبدون حتى مناسبة، المغنية الشعبية زينة الداودية دارت أغنية على ملك السعودي سلمان بن عبد العزيز آل سعود، كتشكر فيه وتعدد الخصال ديالو وسمات الأغنية “سلمان الحزم”.

الداودية هي براسها لي كتبات الكلمات ودارت اللحن وتكلفات بجميع تفاصيل الأغنية. المثير في الأمر أن الداودية موحال واش عارفة التوتر لي بين المغرب والسعودية وكيفاش دايرين سياسات هاد الاخيرة وباش متاهمين العائلة الحاكمة.

بهاد الأغنية دارت الداودية فراسها الضحك، وباش متسمعش الانتقادات سدات التعاليق على الفيديو في اليوتوب.

ولي ضرب طليلة غادي يلقى عدد المعجبين بالأغنية هو نفس عدد الناس لي ماعجباتهمش.

ومصدر “كَود” كشف لينا أن الداودية دارت الأغنية باش تفتح أبواب الغناء في السعودية، خصوصا بعد الحفلات والسهرات لي ولاو كيدارو في الرياض وجدة.

الداودية حسب تبركَيكَة حاولات بجميع الطرق تلقى شي دخلة وملي متشدات ليها حتى حاجة لقات الحل هو الأغنية على ملك بلادهم، وهي حاليا في الرياض دارت سهرة للسعوديين.