مصطفى الشاذلي – كود ///

حكيم زياش البارح لعب فماتش الاسود ضد الباراغواي. الماتش الثاني ديالو فالمنتخب. ما عطاش الثمن ديال عودتو. الجمهور جراو على المدرب وحيد ظلما على ودو. ناضت القيامة باش يلبس التوني ديال لبلاد. النتيجة لحد الان ضعيفة بزاف. ضرب البارة فماتش البارح ودار شي كورات قلال فالمقابل بان ما متحمسش. ما مسوقش. ضيع على الاقل 3 كواري وسط التيران فعشرين دقيقة اللي لعبها قبل ما يخرجو الركراكي فالدقيقة 83. تعطل بزاف باش يبدلو. كان يديرها المدرب قبل.

زياش باش ضيع لكواري ما كانش يرجع ويجري كيف كيديرو لعابة خراين. شفنا الصابري البارح تحول لمدافع ونقد المنتخب من بيت فاخر الماتش.

هاديك القتالية ما بانش على لعاب تشيلسي. باش كان كيضعها فالوسط ما كيتحركش من بلاصتو. كيزيد يعيي الوسط والدفاع.
كانت مشكلة اخرى مع زياش. كتعلق باداء حكيمي. لعاب باري سان جيرمان محتاج المساحة قدامو خاوية باش يعطي ويعاون الهجوم. فينما كان كيبغي يتحرك كيلقى قدامو زياش. حتى باش بغى حكيمي يتيري شي كوفران كان قدامو لعاب تشيلسي. بلا ما نهدرو على شحال من باص ضيعو

الميطا اللولى كان حكيمي كيتحرك بحرية وعطا جوج كواري ديال البيت وتزكلو. ما شفناهش فالميطا الثانية حقاش ديما كان قدامو زياش.
دابا زياش غير مفروض وصافي.

بلاصتو غير مستحقة فالمنتخب. كون بقى احتياطي ممكن تقبلها ولكن يدخل راه ما غادي يزيد والو للاسود. كالها وحيد وبقى وحيد