كود كازا ///

رد بابلو اتشينيكي الناطق الرسمي باسم فريق “بوديموس” فمجلس النواب على اتهام المغرب بالوقوف على التجسس اللي وقع فتلفونات رئيس الحكومة بيدرو سانشيث ووزيرة دفاعو مارگريت روبليس٬ وقال هاد الصباح 4 ماي 2022 “اش من مصلحة للمغرب باش يتجسس على 65 سياسي كاطالاني وباسكي محسوبين على “اعداء الوطن”. هاد السياسيين كلهم كيطالبو باستقلال كاطالونيا وداخلين فصراع كبير مع الدولة المركزية الاسبانية

واضاف باللي هاد الاتهام للرباط ما عندو منطق.

واكد اتشنيكي فحوارو مع قناة “الاولى” =التلفزيون العمومي الاسباني= ان هاد التجسس عبر اختراق تلفونات هاد السياسيين تقدر تكون٬ وراء اكثر من مؤسسة

من جهته اتهم زعيم المعارضة اليمينية يونياس فاييخو هاد الصباح فتصريحات صحافية٬ الحكومة بطمأنة حلفاؤو فاليسار الراديكالي والانفصاليين الداعمين ليها٬ وقال ان اخراج خبر اختراق تلفون رئيس الحكومة عبر برنامج التجسس “بيگاسوس” الغرض منو طمأنة شركاء هاد الحكومة

وكان بولانيوس وزير الرئاسة الاسبانية قال البارح باللي “ماشي مزيان نبداو نقدرو ونتاهمو الدول” وباللي ما مزيانش “المغامرة بالهجوم على دول او دولة”