كريم الشركي – كود //

علنات المديرية الإسبانية للبحرية التجارية أنها جرات على القبطان خوسي ميكَيل تاسيندي، اللي كيتزعم حزب “بوكس” اليميني المتطرف فمليلية، بعدما كان نشر تصريحات قال فيها أن فرقاطة حربية مغربية منعات باطو في ملكية شركة “بالاريا” من الوصول إلى ميناء مليلية، وهو ما سبق ونفته صابرينا موح مندوبة الحكومية المركزية بمليلية نهاية الأسبوع الماضي.

تاسيندي هو اللي قال أنه “تعفى” من السربيس هاد السيمانة، موضحا أنه جاه تلفون من رئيسو نهار الإثنين  خبرو فيه أنه اضطر إلى مطالبة الوزارة الوصية بإقالته “على ضوء الأحداث الأخيرة”، وبلا ما يعطيه شي توضيحات إضافية.

وكان تاسيندي روج عدد من الكذوب فاش قال أن فرقاطة تابعة للبحرية المغربية اعتارضات باطو “بالاريا” وماخلاتهاش تدخل لمليلية، لكن الحقيقة أن الفرقاطة كانت، بالعكس، كاتحمي السفينة الإسبانية، حقاش البحرية كانت كتفركَع باطو قديم فالمنطقة، وبغات تتفادى أن سفينة “بلاريا” تتقاس بالشظايا ومخلفات عملية التفجير اللي تدارت تما.