سامي العلوي – كود كازا //
قالت مصادر “كَود” أن زعيم العصابة “عماد الرحموني” اللي هجمات على قهوة فمنطقة “ولاد سعيد” فإقليم سطات، اللي كاينة فالسطاسيون ديال تما، وجبدو السيوفا على الكليان وكانو جايين باغين يصفيوها لشي مستشار جماعي تما ولقاو غير خوه اللي خوا عليهم وهرب، (زعيم العصابة) طاح اليوم فالدروة بعدما تم نصب كمين ليه ودبا راه مشدود فسرية درك برشيد.
المصدر ذاته قال بللي الشخص بالذات كانت كتقلب عليه مجموعة من الأجهزة و كان مخزون فمنطقة الدورة ودبا راه تشد فيها بعدما حول دارو لمركز تجارة المخدرات بشتا أنواعها.
المصدر ديال “كَود” زاد قال بللي هاد المجرم شبعان روشيرش و يمكن غادي تجي الفرقة الوطنية وتديه عندها، باش تحقق معاه على مجموعة من الضواصا من بينها قضية من كان يوفر له الحماية وخاصة بعدما كان كينشر فيديوهات فالصفحة ديالو فموقع للنواصل الاجتماعي و كيسب فيها المؤسسات.
نفس المصدر قال أيضا أن هاد زعيم العصابة، اللي كيهجم مع العصابة ديالو و كيكونو ملثمين واللي باينة شادين فلوس باش يتعداو على الناس، خاص معاه بحث معمق ودقيق باش يطيحو اللي كان مستر عليه طول هاد المدة بعدما طاحو شي وحدين من العصابة ديالو فهاد لافير ديال “ولاد سعيد”.
