كريم الشركي – كود //
اختارت وكالة الانباء الدولية “رويترز” تصويرة الطفل المغربي أشرف كأحسن وحدة فعام 2021. وهي التصويرة اللي كتوثق للتعامل اللاإنساني للأمن الإسباني مع القاصرين خلال موجة الحريكَ اللي وقعات الصيف الفايت فسبتة.
وكان الطفل أشرف، حاول حتى هو يحركَ لسبتة مع الطوفان البشري ديال 15000 ألف حراكَ اللي بغاو يدخلو لسبتة، ومللي وصل للحدود كان الأمن الإسباني والعسكر كيحاولو يمنعو الحراكَة و يوقفو هاد العملية، فهاد الوقت حاول هو يدخل عومان، ولكن العساكرية كانو كيعتارضو طريقو باش يشدوه قبل ما يوصل للابلاج، هادشي خلاه يعاني وسط الما وبدا كيبكي ويغوت، وتصادف هاد الحادث مع وجود مصور صحفي اللي ركز على أشرف وصور مشهد عملية توقيفو وترحيلو فالحين بشكل غير قانوني.
