ممثل الصبليون فالأمم المتحدة تلاقى دي ميستورا وأكد ليه موقف مدريد الداعم لمبادرة الحكم الذاتي
عفراء علوي محمدي- كود//
الحياة رجعات لكازا من جديد، فحي بيلفيدير الناس بدات تخرج اليوم الخميس شوية بشوية، وأول نهار كيتخفف الحجر على فمنطقة التخفيف 1 بان فيه الفرق بالمقارنة مع الأيام اللي سبقو، حيت ولى عند الناس فالمغرب كامل الحق يخرجو بلا رخصة، يتقهواو أو يتقضاو أو يتساراو أو يديروهوم مجموعين.
وكيبان على وجوه البنات والدراري والرجال والعيالات اللي خارجين فبيلفيدير، كبار وصغار، واحد الارتياح واضح والفرحة صعيب تتخبى، وهوما اليوم كيخرجو من الحجر بعد 3 شهور متتابعة، ماكيخرجو فيها غير للضرورة، وغير حدا الدار.
القهاوي هذ الصباح فبيلفيدير عامرين، وشي قهاوي مطرطقين وممكن تكون الطاقة الاستعابية ديالهم فايتة 50 فالمية، وهي النسبة المئوية اللي سمحات ليهم بيها باش يستقبلو الكليان مباشرة بعد التخفيف.
وكاين فالكليان اللي مقهوي، كاين اللي كيقرا الجورنا، وكاين اللي خدا الفطور كَاع، اليوم بالنسبة للبعض بحال العيد تماما، وضروري من الفطور فالزنقة.
لكن فالمقابل، بيلفيدير مافيهش ناس بزاف، والأجواء كتبان عادية هذ الصباح، الناس خارجة تفوج وتكَلس فالجرادي بكل حرية، وخصوصا فبارك “كازا فواياجور”.
واخا هكذاك، حركة السير ماعامراش هذ الصباح بزاف فشوارع هذ الحي، خصوصا شارع بن تاشفين وشارع باحمد، اللي كانو كيعرفو حركية قبل الحجر، لكن الطاكسيات رجعو يخدمو بنفس الوتيرة اللي كانو عليها قبل وبداو يهزو البلايص، والناس خارجة إيه لكن مازالة أعدادهم قليلة، وغالبا مع العشية غادي يخرجو الناس كثر، أو ممكن شريحة كبيرة منهم مازالة شوية خايفين من كورونا.
محطة “كازا فواياجور” حتى هي اليوم عرفات واحد الارتفاع ملحوظ فعدد الوافدين والمسافرين، بزاف منهم كيفكرو فهذ النهار يمشيو يشوفو العائلات ديالهم اللي غبرو عليهم هذي 3 شهور، وناس خريج جاو باش يقطعو مسبقا باش يمشيو مرتاحين فوقت آخر.