كود كازا ///

سبق ل”كود” كتبات جوج المرات باللي بيان الداخلية اللي فيه اعفاء عامل عمالة مقاطعات انفا رشيد عفيرات بداية هاد الاسبوع بسباب “سوء تدبيره لملف المحافظة على التراث التاريخي والمعماري بمدينة الدار البيضاء ” ما شادش.

شي وحدين ربطو هاد الاعفاء بهدم العمارة اللي فيها مكتب للمحاماة. هاد لشي خلى هاد المحاماة ينزلو فسابقة ويحتجو على القرار. الداخلية فتحات تحقيق اداري والوكيل العام حتى هو فتح قضية فهاد الموضوع.

ايلى صدقنا بيان الداخلية وهاد الشي فشي شكل حقاش ماشي مقنع٬ راه كيهدر علي التراث التاريخي والمعماري. يعني حتى فضيحة ترياب فيلا تقاطع شارعي انفا والزرقطوني داخلة فهاد الشي.

مصدر ل”كود” قال باللي قضية مكتب المحامي اللي فالعمارة اللي طاحت لعب دور. رواية هاد المصدر فشي شكل. قال باللي يرجح باللي تزادت شي وثيقة كانت سباب فقرار الهدم. هاد الوثيقة مسؤول عليها العامل. هاد العمارة ديال شي رجل اعمال عندو شي خدمة مع شي ملياردير فالمحمدية. مشارك معاه فمشاريع ولكن ماشي هاد المشروع ديال العمارة

مصدر “كود” من العاصمة اكد ان هاد رجل الاعمال كان طلب منو المحامي مبلغ فحدود 50 مليون باش يريب العمارة ولكن جاه كثير٬ من بعد دابا ولى مخلص مائة مليون.

المصدر اكد ل”كود” ان العامل يقدر يكون على علم بالقرار ويمكن يكون مشى لريسطورات لملايرية فكازا السبت فالليل وسد ليهم 48 ساعة٬ غير باش يتفادى القرار.

دابا هادي رواية اخرى كتقدمها “كود” لقراءها