القيمة ديالهم ساوية 120 مليون سنتيم.. مغربي شفر كثر من 100 سمارتفون من التوريست ف اسبانيا وهرب للمغرب وغير رجع قرقبو عليه
عفراء علوي محمدي- كود//
“كود” سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.
الناشطة والحقوقية مينة بوشكيوة كانت من المحاورين، وها اش عاودات لـ”كود”:
كيفاش كتدوزي رمضان دابا اللي مسدود علينا؟
أنا ماكيناش فالمغرب بل فكندا، وأنا ماكنصومش، إذن ماعنديش رمضان، ولكن هنايا كاين السدان والحجر أكثر بكثير من المغرب، هنا عندنا منع التجول كيبدا مع 8، وكاينة عقوبات صارمة جدا، والذعيرة كتكون مرتافعة كثر، غالب المتاجر اللي كتبيع الماكلة كتسد مع 5، بطبيعة الحال حتى المقاهي ومسائل الترفيه كلشي مسدود، بالنهار وبالليل، ولكن كنظن الناس اللي كيصومو هنايا مزيانة ليهم، لأنه كلشي كيدخل بكري لدارو، ولو انه حتى فالنهار هنا ماكاينش وسائل الترفيه، غير المتاجر والخدامي الأساسية.
واش الإجراء اللي اتخداتو الحكومة المغربية مزيان؟
الإجراءات انا معاها وضدها، حيت كاين تناقض، كتشوف بنادم مجمع فالزنقة، وكاين لقاءات وتجمعات وتجمهر، لكن فالليل كاين الحجر، شنو الفرق؟ واش كورونا كتجي غير بالليل؟ وفرمضان كاينة مبالغة، واخا يخليو الناس غير يخرجو يتمشاو فالحدائق لأن بنادم كيبغي يتمشى من بعد الفطور، ويكونو شوية ديال المقاهي وشوية ديال الترفيه، مع إجراءات التباعد والكمامات، ولكن باش تمنع بنادم مايخرجش نهائيا من بعد الفطور هذي مسألة مبالغ فيها، وصحاب القهاوي تضررو، ماشي بحال كندا اللي كلشي خدا تعويض قيمتو 2000 دولار.
شنو رأيك فمنع التراويح؟
أنا كون جاو عليا 50 فالمية ديال الجوامع فالمغرب يسدوهم، الجوامع كثار وبنادم كيصلي بلا معنى واحتلال الملك العمومي، بحال نهار الجمعة، كيخرجو يفرشو على برا، وكيمنعو السيارات والمارة يدوزو، آشمن تراويح غتبقى؟ أنا مع المنع ديالها لكن فنفس الوقت يكونو تشديد إجراءات الحجر ديما، ماشي نطلقو الناس فالنهار يتجمعو فالأسواق، وفالليل نقولو ليهم لا تراويح لا قهاوي، منع التجمعات خاص يكون متوازي، مافهمتش علاش مازال بنادم ملاصق فالجامع فنفس الوقت القهاوي والمطاعم مسدودين؟
كاين اللي باغي يفطر بالعلالي، نتي معاهم ولا ضدهم؟
هذي مسألة كندافع عليها بقوة، هذو من الحريات وحق من حقوق الإنسان، وحرية المعتقد، اللي كيمنعها الفصل 222، هذ الفصل بحالو بحال الفصول اللي كتقيد الحريات الفردية، بحال الفصول 489 و490، اللي ماخاصهمش يكونو، خاص اللي بغا يتدين يتدين، ولي مابغاش من حقو، والمغرب أصلا راه فيه كلشي، وبزاف من هذ الأجيال اللي طالعة ماكيصوموش، وعددهم كيتزاد، حيت بزاف مابقاش الدين كيشكل مكون أساسي فحياتهم، وهكذا الناس خاصها تخرج تفطر، باش يتخلق رواج فالحركة التجارية.
كيجاوك مسلسلات رمضان؟
انا هذي سنين وأنا ماكنشوفش الإنتاج المغربي نهائيا، أصلا انا ماعنديش التلفزة من شحال هذي، وإلى بغيت نتفرج فشي حاجة كنشوفها على المنصات اللي كاينين، راه كاينين دابا تطبيقات كاين مواقع ديال التلفزة كتشوف برامج مباشرة، أنا ماكنقدرش نشوف داكشي ديال المسلسلات نهائيا، وحاليا ماكنتبع حتى شي مسلسل، كنشوف افلام او سيريات فنيتفليكس، اما المنتوج الرمضاني فلا يغريني نهائيا، خصوصا المنتوج المغربي، لأنه منتوج موسمي، وكل ما ينتج بشكل موسمي هو معرض لأنه يكون ماشي فالمستوى.