عفراء علوي محمدي- كود//
“كود” سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رأيهم فالإنتاجات الرمضانية.
واليوم ضيفنا هو بطل مسلسل “بنات العساس” اللي دخل لقلوب المغاربة بدور “عزيزي الطيب”..
كيفاش كتدوز رمضان دابا اللي مسدود علينا؟
عادي، قبل الفطور كنعاون الوالدة، وكنفطر مع الدار وكنرجع بحالي، وأنا فالعادة فالليل ماكنخرجش بلا حجر صحي بلا والو، كنشوف أنه ماكاين لاش، وهذي حاجة زايدة تخرج تدور وتكَلس فالقهاوي، أما الحجر كنشوفو سياسة مزيانة باش تحافظ الدولة على صحة المواطنين وتحبس انتشار الوباء.
كيجاوك أعمال رمضان؟
أنا ماكنتفرجش بزاف، لكن التعليقات كتبين أن 95 فالمية من المغاربة فرمضان مابقاوش متبعين المصريين والسوريين وغيرهم وولاو متبعين الأعمال المغربية، وهذشي كيشرفنا، حيت المغربي ولا يقلب على الفرجة فالأعمال المغربية وهذا مؤشر زوين كيعني أنها غادية فالاتجاه الصحيح، ونتمناو مستقبلا تسوق على المستوى العربي…
شنو رأيك فدعوى محامين ضد إنتاج تلفزي اعتبروه “كيسيء للمهنة”؟
زعما المحامين ناس في مستوى ثقافي فكري كبير، وصعيب نجي أنا نصحهم، بغيت نعرف واش ماكيفرقوش بين الفيكسيون والفيلم الوثائقي؟ الفيكسيون خرافات ونكت ومخيلة ماعندهاش علاقة بالواقع، واش إلى صورنا محامي على شكل رسوم متحركة واش فيه إساءة ليه؟ هذي مسألة تخييلية تشخيصية مافيهاش إساءة، واللي ممكن يسيء للمحلمي هو المحامي نفسو.
شنو تعليقك على النجاح اللي حققو “بنات العساس”؟
كان عندنا انتظار أنه غيجيب مشاهدات عالية، حيت خدمنا بزاف وعندنا سيناريو جميل ومخرج وممثلين وطاقم فني فالمستوى، هذشي كلو كان كيبشر بالخير، والحمد لله هذشي عطى التمار ديالو…
واش توقعتي تعرف شخصية “الطيب” اللي أديتيها هذ الشعبية كاملة؟
عمري كنت متوقعها، هي شخصية عادية، ولو أنني حاولت ندير مجهود ونتميز، بعد وفاة “الطيب” فالسلسلة دخلت لمواقع التواصل الاجتماعي وتخلعت وتلفت وماعرفت آش ندير، الرسائل فاتت ألف فماقدرتش نجاوب على كلشي وماعرفت آش نقول، كاين اللي كيهضر معاك بحال فرد من العائلة وكاين اللي معجب وكاين اللي مغرم… كنقوليهم يسمحولي حيت مارديتش على كلشي، بلا ما نهضر على اتصالات الصحافيين اللي ماكتساليش، الخيال العلمي !
لكن كاينة سلبيات وتبارطاجاو فيديوهاتك القدام بهدف التنمر عليك…
الخبث كاين فينما مشيت.. وأنا مايمكنش يسيء ليا شي حد حيت اي حاجة كنديرها بجدارة وفخر، واللي علقو بسلبية أو تنمرو ماكيهمونيش، جميع الفيديوهات اللي تبارطاجاو ديالي فعلا وأنا فخور بيهم، سواء كانو فيديوهات فيها طرائف أو أنا كندير الرياضة، يديرو اللي بغاو وأنا عاطيهم الضو الخضر.
