18/04/2024 07:00
ممثل الصبليون فالأمم المتحدة تلاقى دي ميستورا وأكد ليه موقف مدريد الداعم لمبادرة الحكم الذاتي
عفراء علوي محمدي- كود//
“كود” سولات مشاهير وسياسيين وفنانين وإعلاميين ومؤثرين على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.
الفنان حميد الحضري كان من محاوري “كود”، وتكلم على رايو فالانتاجات الرمضانية والجديد ديالو الفني.
كيفاش كتدوز رمضان دابا اللي مسدود علينا؟
هذ رمضان من أحسن رمضانات اللي عرفتهم فحياتي، جا ساهل مع الحجر الصحي، ولقيت وقت كثر للعائلة والعبادة وقراءة القرآن، وبالنسبة للحجر الصحي فماحسيتش بيه حيت صافي ولفناه، ودابا رمضان هاوا قريب يسالي.
واش الإجراء اللي اتخذاتو الحكومة مزيان؟
مانقدرش نحكم على الوضعية الوبائية حيث هذا اختصاص الناس ديال الصحة، لكن عندي ملاحظة وحدة: هو أنه قبل الفطور الاختلاط والزحام كيكون ومن بعد الفطور بحال الى ماوقع والو، من جهة خرى كاينين ناس كيترزقو من بعد الفطور، كان بامكانهم يفكرو فيهم لانهم كيعانيو بزاف ومابقى عندهم حتى مدخول، أما الاحترازات مزيانين لكن خاص تكون حتى قبل الفطور.
شنو رأيك فمنع التراويح؟
ماخاصش نحكرو بزاف، هي فيها شوية ديال التناقض حيت كاين السماح بصلاة الجمعة والتراويح لا.. والتراويح ماشي فرض سنة فقط، بل بالعكس منين تمنعات سمحات بالتأدية ديالها وقراءة القرآن وقيام الليل فالديور مع العائلة والوليدات، وتفادي ما يعقب الصلاة برا من تجمعات فيها غيبة ونميمة.
كيجاوك مسلسلات رمضان؟
أنا ماتابعتش بزاف صراحة… ماعنديش الوقت للتلفازة، لكن بان ليم كاين تقدم ملموس فالدراما وباين نقدو نعطيو حسن ونبدعو كثر، وليجون اللي طالعين مزيانين ولو كايو نقص فالكتابة، واخا كاينين ديسيناريو مصاوبين بعجالة لكن نتفاءلو خير. اما الفكاهة فصراحة مازال داكشي كيتعاود، وماكاينش فيها إبداع، خاص الناس المناسبين فالمكان المناسب.
شنو رأيك فرفع دعوى قضائية ضد عمل اعتبروه “كيسيء للمحامين”؟
من جهة كيبان لي من حق المحامين يدافعو على مهنتهم وبرافو عليهم حيت خداو هذ الشجاعة، لكن من جهة أخرى راه السنيما أو الدراما أو الكوميديا خاص تكون فيها حرية التعبير، ومجرد الحديث على مهنة ما فماشي داكشي لي كاين فالحقيقة، وفجميع المجالات كاين السيء والمزيان، وممكن يكونو محامين كينطبق عليهم داكشي اللي تكلم عليه السيتكوم وخاص يراجعو تصرفاتهم.
هضر لينا على الجديد ديالك؟
انا قبل رمضان حطيت أغنية فاطمة الكَناوية اللي كتهضر ظاهرة التحرش، هذ رمضان مادرتش لكن عندي أغنية فياشية فيزيون غنخرجها واخا قديمة لظن بفيرسيون جديدة، كذلك كاينة أغنية فعيد الام هدية للأمهات.. وبالموازاة كنشتغل على اغاني جديدة باقيين بصدد الإعداد.
