الرئيسية > تبركيك > رمضان وكونفينمون (الحلقة 15).. إلهام واعزيز فحوار مع “كود”: مايمكنش نبززو على الناس تصوم أو تآمن صحا.. وبغينا الحكومة تحل لينا المسارح
29/04/2021 21:00 تبركيك

رمضان وكونفينمون (الحلقة 15).. إلهام واعزيز فحوار مع “كود”: مايمكنش نبززو على الناس تصوم أو تآمن صحا.. وبغينا الحكومة تحل لينا المسارح

رمضان وكونفينمون (الحلقة 15).. إلهام واعزيز فحوار مع “كود”: مايمكنش نبززو على الناس تصوم أو تآمن صحا.. وبغينا الحكومة تحل لينا المسارح

عفراء علوي محمدي- كود//

“كود” سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ رمضان الاستثنائي مع كورونا، وعلى رأيهم فقرارت خداتها الحكومة.

اليوم حاورات “كود” الممثلة إلهام واعزيز، اللي كشفات أنها ماكتتفرج فالإنتاجات المغربية حتى كيخرج رمضان، وطالبات من الحكومة بفتح المسارح.

كيفاش كتدوزي رمضان دابا اللي مسدود علينا؟

عادي، ربما الحضر العام لي فات كان قوي كثر من دابا، ماجانيش فرق كبير حيت انا إنسانة بيتوتية، وفالصباح راحنا كنخرجو نتقداو بشكل عادي، اما فالليل فحتى بالنسبة للصلا كنصلي فداري…

واش الإجراء اللي اتخذاتو الحكومة مزيان؟

هذ القرار مايمكن تتاخدو الداخلية إلا بتوجيه من وزارة الصحة اللي عنها بيانات، ودابا العالم كلو كيعرف موجة ثالثة، وبالتالي كنظن أن قرار صائب، باستثناء أن كاينين متضررين كالعاملين فالقهاوي والمطاعم اللي خاص الحكومة تدير ليهم الحل.

لكن فالمقابل، قرار إغلاق المسارح تضررو منو الفنانين، وانا بصراحة بعد سنة ونصف من هذشس كنحس بالحزن، وكنطاب من منبركم الحكومة تفتحها، ويتم تطبيق شروط الوقاية من تباعد وتعقيم.

وشنو رأيك فمنع التراويح؟

صلاة التراويح هي سنة وماشي فرض. حنا كلنا بغيناها ولكن ربي كيقول “لا تلقوا بأنفسكم إلى التهلكة”، فمايمكنش نصليو فالاكتظاظ وحنا عارفين انه بإمكان العدوى والمرض ينتقل لينا، وكنظن أن الله ماغيكونش سعيد إلى ارتفعو الحالات والوفيات، كيف كان وقع فعيد الكبير، كلنا بغينا صلاة التراويح اللي كتخلي صلتنا وثيقة مع الله، لكن بإمكاننة فهذ الوضعية الوبائية نصليو فديورنا.

كاين اللي باغي يفطر بالعلالي، نتي معاهم ولا ضدهم؟

مايمكنش نفرض على الناس يآمنو بالله او يصومو صحا، الإسلام ماجاش بحد السيف، لكن الحاجة لي انا ضدها هي الجهر بالمعصية، انا ماشي وصية على الدين ولا فمقام الرسل، وكل الواحد يدير اللي بغا، غير اللي بغا فطر يفطر بعيد على الناس، حيت ممكن اطفال صغار يشوفوه ويديرو بحالو وياخذو ذنوبو.

كيجاوك مسلسلات رمضان؟

صراحة أنا فرمضان ماكنتفرجش فالإنتاجات، ولو حتى اللي مشاركة فيها بحال “قهوة نص نص” و”دار الهنا”، حيت كنبغي نخصص هذ الشهر للعبادة، حتى كيخرج رمضان عاد كنتفرج، لكن عموما، كيبان أن الإنتاج المغربي غادي فتحسن كبير، وكاين اعمال زوينة.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري