مصطفى الشاذلي – كود سبور//

ايوب الكعبي ومحمد بنحليب ما غاديش يمشيو للجزائر غدا الخميس، بعدما تأكد للطبيب عبد الرزاق هفتي صعوبة الاعتماد عليهما فالماتش ديال السبت بملعب مصطفى الشاكر ضمن ذهاب الإقصائيات الإفريقية، المؤهلة إلى نهائيات كأس إفريقيا للمحليين.

الكعبي وبنحليب غادرا الكونصونتراسيون ديال الرباط اليوم الأربعاء وغادي يلتحقو بفريقيهما الوداد والرجاء البيضاويين، باش يكملو العلاج.

الكعبي تضرب منين كان مع المنتخب المحلي فمراكش، ومالعبش الماتش مع الوداد أمام نواديبو الموريتاني في عصبة الأبطال الإفريقية، ونفس الشيء بالنسبة لبنحليب، لي تضرب في الماتش ديال الرجاء البيضاوي والنصر الليبي.
اللاعبان بجوج شافهوم الطبيب وبان ليه أنهما ما يمكنش يلعبو كونتر الجزائر.

الحسين عموتة، مدرب المنتخب المحلي، قرر ما يعيطت حتا لعاب بلاستهوم واكتفى بلائحة فيها 22 لاعب فقط.

المنتخب المحلي غادي يسافر غذا الخميس للجزائر وغادي يدرب جوج المرات تما قبل يلعب نهار السبت جاي.

المنتخب المحلي خاض مباراتين وديتين فمراكش أمام النيجر وبوركينافاسو وربح فيهم بجوج. أما المنتخب الجزائري فلم يلعب أي مباراة ودية قبل مواجهة المنتخب المحلي.