كود هناء ابو علي علي الصافي تطوان ///

علمت “كود” ان فروع “فيوليا” بالمغرب خدامة على نقل جميع المعطيات والبيانات الخاصة بالمشتركين في مدن طنجة وتطوان واصيلة فالمرحلة الاولى وغادي تجي الرباط من بعد٬ الى خارج المغرب. وفق معطيات حصلت عليها “كود” فهادي 6 اشهر بدات فيوليا ففرنسا بنقل كاع اللي عندها ف”داتا سانتر” اللي كانت خاصة بها وحولاتها لشركة خاصة. هاد الشي بدا حتى فالمغرب

دابا المنخرطين ف”امانديس” و”ريضال” كان عندهم “داتا سانتر ديالهم” اي كل حاجة عندها علاقة بالبيانات بالمنخرطين بالموظفين بالفاكتورات…. وهاد الشي ما غاديش يبقى عندهم فالشركة. ممكن تكلف بيه “امازون” و”گوگل”…. ولا اي شركة اخرى يسوتريتيو ليها. بحال شي بنك معلومات.

الخطر فين كاين. هادا اسمو الامن المعلوماتي للدولة. الشركة الفرنسية غادية تسالي ليها العقد من هنا ل7 سنين على ابعد تقدير وهادوك المعطيات ما كاين حتى شي ضمانة ان هادوك الشركات ما يبيعوهمش. كلشي عارف اش واقع فالحروب الاقتصادية اش دارت ميريكان باش تجسسات على شركات غير امريكية باش تربح صفقات طبعا كاين حتى القرصنة وشفناها فقضايا كثيرة بحال “باناما بيبر” و”ويكيليس”.

وفق معطيات حصلت عليها “كود” فان “امانديس” بدات بالميساجري كيخص 1300 موظف. الايميليات. قبل كان عنوان فالمغرب هو “امانديس. ما” واليوم ولى “فيوليا. كوم”. تجربة انطلقات ففرنسا وتعممات فالمغرب.

الايمليات مهمين بزاف. حتى فهاد الحروب الاقتصادية ايلى تقرصن ليك ايميل ضيعتي بزاف بزاف. كتكون معطيات حساسة ومفاوضات … كلها ممكن تقرصن وتعري الشركة. المثير ان الجانب الامني كنقصدو بيه تحصين الايميليات كان مزيان بزاف بزاف تحكي مسؤولة كبيرة بهذه الشركة في تطوان ل”كود” مضيفة ان كاع التجارب اللي دارت بينات بللي محمي مزيان بزاف.

بعد الميساجري غادي يجي الدور علي قاعدة البيانات.

هاد الشركة الفرنسية عندها جوج قاعدة بيانات مهمة بزاف. الاولى كتهم المشتركين فطنجة تطوان اصيلة. فيها معلومات ديموغرافية وعناوين وبيها تعرف القدرة الشرائية لهاد السكان من خلال شحال كيخلصو الما والضو. قاعدة البيانات الثانية كتهم الجانب المالي لشركة “امانديس”. كلشي اللي عندو علاقة بالكونتابيليتي.

باش تسالي مع حتى التطبيقات اللي عندها. هاد الشي داخل فمشروع “ساطا واد” اللي كيسمح ليك تكونيكتا فاي بلاصة وفاي ساعة. فيوليا كتبيع هاد الشي “هادي ماشي مهمتنا. خدمتنا الما والضو” طبعا كذوب وصافي. هاد الشي ديال السوتريتانس بداتو فروع “فيوليا” فشمال المغرب هادي 3 سنين. ما بقاتش كتطبع الفاكتورات وولات شركة كازاوية مكلفة. جا بعدها سونتر دابيل. هاد مركز الاتصالات اللي كان عند الشركة تحيد هادي عام ونص. اليوم وصلات الميساجري. غدا يحولو كاع سكان طنجة وتطوان واصيلة للخارج ويدوزو للرباط

هادو بجوج غاديين وليوا خارج المغرب. وباش تسالي هاد الشركة عقدها مع المغرب من هنا ل7 سنين فين غاديين يبقاو وشكون يقدر يحمي هاد المعطيات الشخصية المهمة بزاف

وفق مصدر “كود” فان وزارة الداخلية كانت رفضات فالبداية هاد الشي باعتباره حماية للمعطيات الشخصية ومن بعد سكتو والعملية تمات.

من بعد طنجة وتطوان واصيلة غاديين يدوزو للرباط وهادي مشكلة اكبر. الدولة كلها فالرباط مؤسساتها كلها فالرباط من القصر حتى المديريات الصغيرة. واش الدولة غادية تقبل معطيات حول الملك وعائلته والوزراء والجنرالات والموظفين والمواطنين فهاد المدينة تخرج وما تبقاش فالرباط؟

سولات “كود” مهندس فالدار البيضاء واش ممكن هاد المعطيات تتباع؟ فاكد ان الامر وارد “واقعيا ما يمكنش يتباعو ولكن من التحت التحت حتى حد ما يمكن يعرف. حقاش التجارب بينات باللي كلشي ممكن. شفنا تسريبات كتهم المخابرات الامريكية”