وشوفو التلاميذ كيولاو.. تلميذ شرمل إداري بثانوية فسلا وشرك ليه وجهو وباقي داخل خارج للمدرسة وغليان وسط أسرة التعليم فالمدينة
سهام البارودي – كود//
شحال من مرة خاصني نقولها و نعاودها ! ” الحجاب ماشي لباس عادي الحجاب راه رمز من رموز الاسلام السياسي” ” الحجاب راه ايديولوجية ” “الحجاب هوا رمز من رموز الاقصاء و العنصرية ضد المرأة ” وا لايني مصيبة هادي مع القنديلات و القنادل و من حذو حذوهم ! لي كايمارسو التخوفيش فاش كايهضرو على الحجاب و كايبقاو عليك ” اه حقا الحجاب حرية شخصية ” ” اه حقا الحجاب راه لباس فحالو فحال الصاية ” ! لا يا لالة لا يا سيدي الحجاب ماشي لباس عادي فحال الدجين و الصاية الحجاب لباس كاتلبسو المرأة حيت عمرو ليها راسها بالافكار الظلامية لي مبنية على النظرة الدونية ليها و للجسد ديالها لي كايتعتابز عورة و فتنة ! الحجاب رمز من رموز اللامساواة ! انا كانشوفو رمز من رموز العنصرية فحال دوك الخرصات لي كانو كايركبو للعبيد فتجارة الرقيق ! فحال ديك الشارة الصفراء لي كانت النازية كاتفرض على اليهود ! الخرصة كاتميز العبد و الشارة كاتميز ليهودي و الحجاب كايميز المرأة !
قاليك ” الحجاب حرية” ! ايوا الله يلعن الكذاب ! فين كاينة شي حرية فالحجاب ؟ الاختيار و لي هوا شرط اساسي مقرون بالحرية لا يتوفر فالحجاب ! غانشرح ليكم بالخشيبات حيت انا عارفة النيڤو على قد الحال ! كانقولو انه كريم حر انه ياكل الفاكهة لي بغا فاش كانكونو عاطين لكريم ياكل التفاح او البنان او الليمون و ديك الساعة راه حر يختار لي بغا بلا مانلوموه و لا نعاقبوه و لا نقتلوه على الاختيار ديالو! اشمن حرية عند العيالات ف ارتداء الحجاب فاش كاتقوليها راه مفروض عليك تلبسيه و إلا فإنك غادة لجهنم و راه شعرك غاينوض الفتنة بين صفوف المسلمين و كاتواعدوها بالعقاب الشديد فالدنيا و الآخرة اذا مالبساتوش ! الحجاب ماشي حرية خصوصا عند بزاف ديال العيالات لي ساكنات فالاحياء الهامشية ! فدوار الحاجة و الهراويين و التقدم و احياء الصفيح لي البنات مجبرات انهم يغطيو راسهم و الا غايعتابروهم الهايش مايش فالدرب انهم قحاب! الحجاب ماشي حرية بالنسبة لبزاف ديال العيالات كبار لي مجبرين يديروه باش يوقرهم هايشر فالزنقة ! الحجاب ماشي حرية عند بزاف ديال البنيات صغار شاء القدر انه يتزادو وسط اسر ظلامية كاتشربهم فالبزولة افكار متخلفة حول جسدهم و شعرهم و الكينونة ديالهم و كايعلموهم انهم الى مالبسوش الحجاب راه كايرتاكبو جريمة ! الحجاب ماشي حرية عند الافغانيات و الايرانيات و العيالات عبر العالم لي لامالبسوهش كايخويو عليهم الدوليو و يشعلو فيهم العافية !
على آشمن حرية كاتهضرو ؟ الحجاب فالشرق و الحرية فالغرب و فگود كانآمنو انه المرا خاصها تتحرر من داك اللباس الاقصائي العنصري و تتصالح مع الجسد ديالها و مع شعرها و مع الجمال ديالها حيت هي ماشي عورة و ماشي فتنة و مافيهاش شي ديفو خاصها دوز حياتها كاملة و هي كاتصلح فيه!
انا بعدا شخصيا كانشوف بلي أي وحدة كاتلبس الحجاب راها كاتساهم بشكل كبير فالمعاناة ديال بزاف ديال العيالات عبر العالم ! سوا لي دايرينو ! سوا لي مادايرينوش ! و كاتساهم فانتشار النظرة الدونية للمرأة و للجسد ديالها! دنوب دوك المغربيات لي ماكايقدروش يلبسو لي بغاو فالصيف و يعومو فالبحر بالمايو و ذنوب دوك البنيات لي ساكنين فديور الصفيح و بزز منهم خاصهم يلبسو الدرة باش يخرجو يتسخرو فالحومة و ذنوب دوك الايرانيات لي كايخصرو ليهم وجهم بالما قاطع حيت خارجة ليهم شي زغبة من الدرة عليك آ موخنونة !