كود طنجة ///

في رد على انتقادات كل من عزيز الرباح والادريسي الازمي البارح فاكادير واخا ما جبدهمش بالسمية٬ قال حزب التجمع الوطني للاحرار اليوم فنطجة ان توفير مليون منصب شغل في ظل جائحة كورونا ماشي للمزايدة، واضاف رئيس الحزب عزيز اخنوش انه كان يمكن الحديث عن أكثر ولكن الجائحة فرضت علينا أن نكون معقولين ولا يمكن الكذب على المغاربة.

اخنوش قال ان هاد المعطيات اللي كيقدمها ماشي بهدف الكذب على المغاربة ثم تحدى خصومه “اللي عندو القدرة يوفر كثر يگولها” ثم هاجم البي حي دي دون ان يسميه٬ ما يمكنش نكونو بحال حزب سياسي التازم بنسب معينة من النمو وفاللخر ما حقق منها غير شي بركة.

رئيس الاحرار قال ان برنامج حزبو هدفو “اعادة الثقة للعمل الحزبي” وباللي عندو ناس قادرين على هاد الشي حقاش حزبو حزب كفاءات٬ واضاف “ما دخلناش للمصانع حقاش وزرا. دخلناها من صغرنا. شخصيا دخلت للمصنع وانا طفل وكتعرف صعوبة الخدمة فيها”.