محمد سقراط-كود///

هاد اليوماين كنتفرج فيديوت فيوتوب خاصين بناس كيمشيو ويصورو بجودة مزيانة وبلا هدرة فقط أصوات المنطقة، وكتلقى أغلب مدن العالم مصورين فيهم هاد الفيديوات وبجودة ممتازة الأغلبية فوركا، مثلا العاصمة سيول بحال الى كتشوف المستقبل نظافة كبيرة بزاف بزاف الناس لابسين نقي وجديد وكيبتاسمو للكاميرة والأضواء بحال الى كتفرج في بليد رانر 2019 المستقبل كيفاش تخايلو ريدلي سكوت فالتمانينات، في أوروبا كذلك الألوان واضحة والخضورية ناصعة، واحد القناة عندها فيديوات كثار من مختلف بلدان العالم ومن بينها المغرب، وانا نقول آجي نشوف المغرب، لقيتو مصور فيديوات في فاس وفي مراكش، الفيديو اللول لي شفت في الملاح ديال فاس منطقة تجارية عبارة على ممر وسط سوق فيه صحاب الحوايج والخياكات وقيسارية ديال الذهب، أغلب بنادم لي شداتو الكاميرة مغوبش والألوان بحال الى داك الفيلتر ديال الميكسيك لي كتزيدو هوليود على الأفلام لي زعمة مصورة تما، الألوان كاشفة وباهتة وبنادم خيب ومالابس مزيان وفي الغالب غير الدراوش وولاد باب الله، ووسط السوق كتلقلا قهاوي مخرجين الكراسة برا وبنادم منشور وسط النهار ومقابل الغادي والجاي، ماشي كياكل أو كيتقهوى ويقرى جورنان أو يشوف في تيليفون أو معاه صاحبو مجمع معاه، ألا ، بنادم مريح حاط قهوة كحلة وموجه الكرسي جيهة الشارع وكيشوف في بنادم لي غادي وجاي، ظاهرة موحال تشوفها فشي قنت.

حتى داك بنادم مقاد زوين لابس مزيان نقي إنسان ديال هاد القرن قليل فين كيبان شي واحد أو وحدة دايزين، وكيكون حالة شاذة، نقولوا هذا الملاح حي شعبي في مراكش صور المدينة القديمة وصور كليز، أولا الكم الكبير ديال الطلابة وديال الناس لي كيغوبشو في الكاميرة بحال الى غادي ياخد تصاورهم ويحطهم في فيلم مية وعشرين نهار في سودوم ديال بازوليني ، بنادم مكنزز ومزير وداك الإنسان الودود كتلقاه بهلواني، حاليا في المغرب الى بغيتي تشوف الطبقة الوسطى لفوق خارجين كيتساراو خاصك تمشي للقهاوي الغاليين أو للمولات( من غير برج فاس)، كيفاش الشارع المغربي والجرادي والرومبوانات والغابات والسويقات والجوطيات والأسواق الأسبوعية محتلينهم الكادحين المغاربة وصولا لبرجوازية الصفيح، بينما الطبقة الوسطى المتعلمة مابقات كتسال والو في الشارع المغربي ومكاينينش في الفضائات العامة من غير المولات وبعض الشوارع الرئيسية في المدن الكبرى النقية، ولي فيها مخاطر منها التحرش كأبسطها والسرقة أو الإعتداء، طبعا هادشي ماشي عام كاين مدن آمنة نسبيا مقارنة بأخرى ولكن عموما في حالة المرأة فراها هي لي كتجي فيها الدقة سواء في فاس أو مراكش او نيويورك أو موسكو أو نواديبو من غير ولاية ميغالايا في الهند لي المرأة هي لي كتحكم وتورث وتسير المنطقة والراجل غير زايد وحاليا كيناضل من أجل حقو في الورث.

الطوموبيل وسيلة نقل ولكن في المغرب هي وسيلة حماية من التواجد في الشارع والفضاء العام ومشاركة المساحة مع الهايش مايش، وسائل النقل العمومية هي معاناة يومية لأي واحد باقي محتاج يستعملها، ملي كتدير البنت الطوموبيل واخا حتى هي مكتحميهاش من التحرش والسرقة ولكن كيخرجو ليها وجوه من الجنب الكارديانات والطلابة في السطوبات داك اللعبة ديال مابقيتيش كتشدي الطوبيس مابغيتيش تخلطي معانا وأراي دوري معانا، وكذلك حتى الرجل، لذا خاص شي خطة اجتماعية باش يتحرر الفضاء العام ويولي يحكمو القانون ومايبقاش إمتداد للأحياء الهامشية، خصوصا دابا مع ماطر الشينوا مكاين غير نقب هرب، راه مايمكنش تبقى الطبقات المنتجة والموظفين والمهندسين والأطباء حياتهم مقوقعة ومحصورة بين الدار السانسور الكاراج الطوموبيل الخدمة القهوة الأسواق الكبرى المول، الريسطو، العائلة، البوب، البار، المهم الشارع ويتمشى ويطلق رجليه يكلس في جردة داكشي غير مطروح لأنهم حتلوهم الحازقين، من غير في الرباط المدينة الوحيدة لي جودة الحياة فيها طالعة وأماكن كثيرة فين يمكن تمشى على رجليك في أمن وأمان.