محمد سقراط-كود///

شحال هادي كانو الولاد هوما التقاعد ديال الواحد، كيولد زينة ديال الولاد كيخدم عليهم فصغرهم باش يخدمو عليه فكبرو، دابا الوقت تبدلات ولكن العقلية باقا هي هي، باقي بنادم كيولد عرام ديال الولاد ولكن فعوض يخدمو عليه فكبرو كيوحلو ليه فراسو ، وفكل دار وليتي تلقى ولد أو بنت فايتين التلاتين وباقي ساكنين مع دارهم وكاين كاع لي تزوج وولد وباه كيصير عليه وعليها وعلى ولادو، وفالجهة لخرى كاين الأباء الفالصو لي غير ولد وطلق وهو مقابل البلية والدوران حتى الى كبر شي واحد من الولاد وبشي ضربة حظ أو بشي موهبة أو الخدمة بزاف دار لاباس عاد كيتفكرو باه ويحوز عندو ياكل من الغلة واجدة، ويبدى يقرى عليه داك الزابور ديال أنا باك أوليدي ورضاة الواليدين هي كولشي.

رضاة الواليدين بقات هي ديك الضمانة الميتافيزيقية باش مايخرجوش الدراري على العهد ويحافضو على الكونطرا لي جامعة الواليدين بولادهم، لدرجة خدات هاد رضاة الواليدين أبعاد أسطورية، لي كيفلت من شي كسيدة كيقوليك غير رضاة الواليدين لي نجاتني، لي كتيسر ليه فشي خدمة أو فالحياة كيقوليك والله غير دعاوي لميمة ورضاة الواليدين، لي تقلب فشي فيراج كيتسمى مسخوط الواليدين، وهاداك لي كيتعرف معندوش مع واليديه ديما بنادم كيبقى يتسناه توقعليه شي مصيبة، حيت ماجاتش يخرج على السطر ويكون حر من هاد العلاقة ويبقى سالم غانم فنظر المغاربة، وغير يكحب يقوليك جاه مرض الصدر شتي سخط الواليدين.

سعيد عويطة باين الأب ديالو مبلي وملوية عليه شي وحدة باغا تذوق من الغلة، وستغلوه باش يعطي دوك التصريحات ويسيئ لولدو ولعائلتو ولراسو وهو كبير فالعمر، ولكن لقوادة ديال بصح هي الهجمة على عويطة ومرتو وإتهامه بالسخط وكولشي تعاطف مع الأب، واخا سمعو بوذنيهم بأنه عياو يحاولو معاه ووالو مكاين حتى نتيجة ومخلاو فين داوه فالعالم ومخلاو ماداروليه، ومع ذلك كتلقى بنادم كيقوليك والا هاداك باهم كان عليهم يعالجوه واخا يكون كيما كان كيبقى باهم، راه باك مكتعنيش أنك طول حياتك تبقى عبد ليه، راه أي بعرور يمكن يكون أب، لي صعيب هو تكون إنسان صالح تربي ولادك وتعطيهم الحب والإهتمام اللازم وبلا ماتسنى منهم يردوه ليك فشي وقت، الولاد مابقاوش إستثمار.