محمد سقراط-كود///

جدودي بجوج من جيهة الواليدة أو الواليد كانو كيحتافلو بيناير الفلاحي واخا كيعتابرو راسهم عرب الشاوية والرحامنة إلا أن هاد العيد كانت كتحتافل بيه كاع مناطق المغرب بغض النظر على شنو كيظنو في العرق ديالهم، جدايا كانت كتخرج للطبيعة وتجمع شي أنواع ديال البقولة والربيع وكتصايب بيهم واحد الكسكسو خاص بهاد النهار، وكان كيدوز عندهم يوم خاص وبصح يوم عيد وفيه كيشكرو الطبيعة وكيتمناو يجيهم عام فلاحي مزيان( في الرحامنة مكاين غير الجفاف الصابة كتجي مرة فسبع سنين)، وكيدوز يوم بطقوس خاصة متجدرة وقديمة في المجتمع، بحال بزاف ديال الأعياد الأخرى مثل الميلود وعاشوراء، طبعا ملي هاجرو واليديا من القرية للمدينة ماجابوش معاهم هاد الإحتفال وبقا حاجة خاصة بالبادية حتى الى تصادف وتواجدنا داك النهار فالعروبية عاد يمكن نعيشوه ونحتافلو بيه، وملي ماتت جدايا مابقاوش أصلا كيحتافلو بداك النهار خصوصا مع دخول الضو للدوار مابقاش الوقت لبحال هادشي، ومابقاتش فالدار المرة لي غادا تخرج تحش الربيع وعارفاه بعدا شناهو وسمياتو وتقدر تطيب ديك الوصفة.

وهاديك كانت آخر صلة لينا بهاد العيد لي من بعد غادي نعرف أنه رأس السنة الأمازيغية، والصراحة معرفتو غير مع الأنترنيت أما قبل كنت كنعرف غير ناير الفلاحي، ولكن على خلاف أعياد وطنية أخرى بحال مثلا حداش يناير لي نهار تم الإقحام ديالو صحة في اللاوعي الجمعي، مأرخ كحدث فاصل في تاريخ المغرب وشبعنا دروس عليه أيام المدرسة والتلفازة كانو معششين فيها الموقعين على الوثيقة وكيفاش وعلاش واخا دديك الفترة عند أغلب المغاربة ضبابية شوية، ولكن الدولة خدمات وبدلات مجهود باش تقنعنا أنه يوم مميز في تاريخ المغرب كيستحق أنه يكون عيد وطني ويكون يوم عطلة رسمي، ولكن النتيجة هي أغلب الناس ناسيينو وبالنسبة ليهم هو يوم عطلة فابور من عند الدولة الله يجازيها بيخير وإلى جا مع السبت والحد هاداك هو الربح، وحتى عيد الإستقلال عمرو مكان عيد بصح عند بزاف ديال المغاربة كيف ما هو الحال في عدة دول في العالم، العيد الوطني الحقيقي لي كان شحال هادي وكيعرفوه كاع المغاربة وكيحتافلو بيه هو عيد العرش أيام الحسن التاني وكيجي من وراه ولو بحدة أقل عيد المسيرة الخضرا، حيت جديد وكانو عندو أغاني خاصة زوينة بزاف.

أنا مثلا وكنهدر على راسي ورأيي غير ملزم، حداش يناير مكيعني ليا والو من غير أنه يوم عطلة الإدارات كيسدو والى عندي شي غرض نأجلو من بعد، وكنحس بهاد النهار أنه مفروض فرضا على المغاربة ومكيفيدهم بوالو وماشي يوم إستثنائي عندهم، ومكيزيدش يعزز الهوية الوطنية، وبالنسبة ليا العيد الحقيقي لي خاص يتم الإحياء ديالو وينتاقل من البادية للمدينة ويتنظموا بمناسبته أنشطة ومعارض وإحتفالات راه هو رأس السنة الأمازيغية لأنها جزء مهم من هويتنا كمغاربة وعيد كانو كيحتافلو بيه جدودنا وجدودهم وعندو جذور وتاريخ لأنه عيد المغاربة كاملين وماشي عيد الأمازيغ فقط كما يتم تسويقه حاليا، بحال الى راه عيد خاص بتيزنيت، بل العكس راه عيدنا كلنا والى كاينة حاليا المطالبة بإعتباره يوم عيد رسمي فخاص هاد المطالب تمتد حتى لمطالبة الدولة بإحيائه وتمدينه وباش يحيى من جديد عند المغاربة لأنه كيمثل الهوية ديالهم وأصولهم.