الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات
الحكومة دارت بيان هادي يومين كتقول باللي غادي يكون تزيار ومن القرارات اللي دارت باللي ممنوع شي تجمع فيه اكثر من 25 شخص. فاول يوم من بداية تطبيق هاد الشي للي هو البارح لثلاث دار حزب التراكتور برئاسة امينو العام المحامي ورجل القانون عبد اللطيف وهبي تجمع فزاكورة كانت القاعة فيه عامرة. ماشي غير فايتين بزاف 25 شخص واللا ما كاينش التباعد. شي لاصق فشي كيف كتبين الصور.
دابا هادا رجل قانون وسياسي كيعطي القدوة للمغاربة على التفاعل مع قرارات الحكومة. هادا راه زعيم حزب مرشح للانتخابات وهو ضد تطبيق اجراءات حماية للمغاربة من انتقال هاد الڤيروس.
ما مسوق حتى لشي حد والداخلية متواطئة معاه وداعماه باش دارت عين الميكا. شفنا فالرباط مطاعم غير فاتت التسعود واخا مخبيين٬ وقفات عليهم السلطات وطبقو عليهم القانون.
دابا علاش غير هاد الحزب لا فوجدة لا فغيرها كيحتارم القانون. لا تباعد لا كمايم لا احترام العدد المسموح بيه. غير تقول لينا الداخلية طبقو القانون على كلشي الا التراكتور ونفهمو. مسيرة ولد زروال ما كلاتش ف2016 ودابا راها حتى حاجة ما غادية تاكل مع هاد الحزب “الوافد الجديد” كيف سماه ادريس لشكر الكاتب الاول للاتحاد الاشتراكي واحد النهار. خطيئة الولادة تابعاكم تابعاكم.
دابا غير تحملو مسؤولية عدم تطبيقهم للقانون وتعريض حياة مغاربة للخطر بسباب هاد التصرفات اللي دارتوها فزاكورة
لمغاربة من حقهم اليوم يخرجو فعصيان عام ضد قرارات الحكومة. ايلى قالت ليهم شي حاجة يردو عليها: ديرو معانا كيف درتو مع البام ومع زعيمو وهبي