سهام البارودي – كود//
زوين بزاف تكون راجل فالمغرب ! شنو مادرتي ماعمرك كاتحمل المسؤولية غاتلقا ديما مك و باك و صحابك و الناس واقفين فصفك و كايقولو ليك ” مايبقاش فيك الحال راك راجل آ سااااحبي” ” راك راجل” شنو مادرتي ! شنو ماخربقتي ! شنو ماكانو الاخطاء ديالك ديما غاتسمع ” هانية راك راجل ” و لاكانت القضية داخلة فيها شي مرا مصيبة كحلة عاوتاني حيت غانشدو ديك المرا و غانلصقو فيها گاع الاخطاء فحالا الراجل غي دريري صغيور غير مسؤول على شنو كايدير ! مرا خانها راجلها مثلا كاتلقاها كاتهضر عليه على اساس ” داتو ليها شي وحدة” ماشي هوا مشا برجليه و بزبو عند شي وحدة !
نفس الشيء واقع اليوم فالقصة ديال ندى حاسي و نزار السبيتي كلشي تقلب عليها و كلشي كايصورها على اساس انها هي خايبة و استغلالية و شدات نزار و استغلاتو و بعداتو على مو و خوتو و طلعات بيه القناة ديالها !
ايه هادشي كاين ! ندى حاسي استغلت نزار باش طلع القناة ديالها ولكن فيناهوا نزار وسط هاد المعمعة ؟! فيناهي المسؤولية ديالو ؟! السيد ثلت سنين و هوا تابع البنت فالسوشل ميديا و من مدينة لمدينة ! كون كان فشي دولة اخرى كون دعاتو على المطاردة راه جريمة هادي و ضربوه بالحبس و الغرامة و مايقربش لأي قنت هي فيه بشي خمسميات ميترو ! زيد على هادشي انه بخاطرو بغا يتجوج بيها و بخاطرو مشا معاها للخميسات و بخاطرو خلاها تسلخو و بخاطرو صور معاها ڤيديوات طلعات بيهم الادسنس و فرع لينا كرنا بديك الهضرة ديال “مراتي الحبيبة” ” كانبغي مراتي” “انا قنية قدام مراتي” “نبوس رجلين مراتي ” …. السيد كايهتهت بسميت مراتو ! تا من مو دار عليها ڤيديو قاليها ” بعدي ليا من مراتي واش باغا تمرضي ليا مراتي …” و مورا هادشي كولو تبغيو تلبسو لندى بوحدها البردعة ؟! لا ماشي معقول! نزار كان كايتذلل بخاطرو و كايلقى راحتو فبوسان اليدين و لحيس الرجلين ! هوا هاكاك ! شخصيتو هاكاك ! انسان تابع خاص ديما شي حد يگيدو لاماكانتش ندى غايكون الملولي و لاماكانش الملولي غايكون شي حد اخور … مهم نزار ديما ورا شي حد !
نزار السبيتي و عائلتو راه خاصهم يشكرو ندى حاسي ! علاش واش واحد فحال نزار لاخدمة لا ردمة لا موهبة لا هضرة زينة ! السيد واقيلة مريض نفسيا عندو شي نوع من انواع التوحد فين عمرو كان يحلم انه ينعس حدا شي وحدة فحال ندى حاسي كارداشيان المغرب ؟! فين عمرو كان يحلم بهاد الشهرة كون ماعطاتوش ندى حاسي فرصة يبان حداها ؟
ندى حاسي خيرها سابق على نزار و كون ما ندى كان غايبقا تالف فتارراست كايدير دوك الافلام القصيرة الحامضة !ولكن للاسف العقلية الذكورية المتغلغلة فالمجتمع خلات الناس ينساو نزار و المسؤولية ديال نزار و يلصقو كلشي فندى و يبغيو يصوروها على اساس انها انسانة خايبة استغلت نزار السبيتي في حين راه حتى هوا استغلها و تمخمخ فخيرها ! و كان بيناتهم استغلال متبادل ! دونون دونون ! علاش نزار فين عمرو كان غايجيب مرا فحال ندى ؟! باش غايجيبها ؟! بقرايتو ؟ بالمستوى الاجتماعي ديالو ؟ بالوظيفة ديالو المهمة ؟! بالمواهب المتعددة لي عندو ؟! السيد اصلا خاصو تتبع من طبيب نفسي يشخص الحالة ديالو العقلية ! غي كاينوض كلمة جوج يهدد بالانتحار ! واش هذا انسان نورمال؟
داكشي علاش شخشيا كانساند ندى حاسي فهاد المعركة ضد الذكورية و الرجعية لي مغلغلة فالمجتمع و لي كاتصور ديما الراجل على اساس انه غير مسؤول و انه اي حاجة طرات ليه فراه مراتو هي السبب فيها.
