سعيد الشاوي ـ كود سبور ///

هاد ليام حيوطا دكازا عامرة بشعار “مافيا لقجع” تلقاه فالحي المحمدي فالمدينة لقديمة فالسونطر فبوركون …… بدات فوسائل التواصل الاجتماعي وولات جدرايات فالدار البيضاء. جزء ماشي كل “الوينرز” دافع عليها. دار بيان هدر فيه على “الفساد الذي ينخر كرة القدم المغربية”.

الهدرة على الفساد معقولة وخاصها نقاش. ولكن الحملة ضد لقجع رئيس الجامعة الملكية لكرة القدم علاش؟

انا ما غاديش نهدر على شكون مع وشكون ضد. غادي نهدر كودادي كنموت على الوداد وكنفتاخر بالوينرز والخدمة الرائعة اللي كيسديها للحمرا٬ غير راني ضد هاد الهاشتاگ”.

دابا كاين جوجت الامور اللي حركات هاد الشي بالنسبة لي. اولا قرار الجامعة واللي فالحقيقة قرار الدولة المغربية وهو قرار مزيان ديال انهاء الماتشات 9 اللي بقات فالبطولة. شي وداديين كانو ورأيهم فيه نوع من اللوجيك٬ ديال مع هاد الجايحة علاش ما توقفش البطولة كيف وقع فهولندا وبلجيكا وفرانسا وتعلن الفرقة اللي هي الاولى بطلة. فحالة بطولتنا هي الوداد البيضاوي. غير هاد الرأي يناقش. المغرب ماشي دولة ضرباتها “كورونا”بحال اوربا. بمعطيات بسيطة. راه ما وصلناش لحد الان ل20 الف حالة من نهار بدا هاد الفيروس دكورونا. الموتى قل من 300 وفاة. ففرانسا راه كانت كتسجل فالنهار اكثر من الف قتيل شي ايامات. يعني لا مجال للمقارنة.

الامر الثاني هو قرار الجامعة بخصوص ماتش الرجاء ضد الجديدة اللي تقرر يتعاود. هذا فالحقيقة ماشي هم ودادي. ايلى كان شي خلل ولا ظلم خاص الجديدة دافع على راسها. وعلاش اللا الجديدة تلعب وتربح بالكورة. قادرة على هاد الشي.

كودادي كاين لوجيك اخر. الوداد ما محتاجاش لا للتحكيم لا لكورونا فيروس. ما ترضاش كاحسن نادي فتاريخ المغرب وما يهدرش معايا شي حد. يجي يشوف البطولات وكؤوس العرش والبطولات الاخرى. حنا النادي الاكثر تتويجا فتاريخ المغرب. اذن باغيين نديو هاد البطولة بالقدم. بالكورة. غاديين نربحوها. عندنا مدرب مزيان وفرقة مقادة.

قرار الجامعة باش تكمل البطولة مهم لينا وللرجا٬ علاش؟ دابا باقية شهرين لنصف نهاية الشامبيانز ليك دالاندية فافريقيا وزيد عليهم حسنية اكادير ونهضة بركان كأس الكونفدرالية الافريقية. ولى مشات الاندية المغربية لهاد الماتشات وما عندهمش فرجلهم فصعيب يديرو نتيجة. هاد الماتشات التسعود مهمة بزاف. راه 5 اشهر بلا كورة وشي 4 اشهر بلا تداريب صعيبة بزاف بزاف.

ما خاصش كاع الوداديين والرجاويين او لقجع لعب دور حاسم باش نصف النهاية تلعب فكازا وفالقاهرة. راه المصريين كانو غاديين يديوه عندهم ويطلع معانا القالب. وجود القجع فاللجنة التنفيذية للكاف لعب دور بزاف فهاد القرار.

لقجع دار امور كثيرة لكرة القدم المغربية. باقية امور اخرى، وهادي مهمة كل مسير فالاندية المغربية باش يجيب الحلول للمشاكل اللي عندنا. الوداديين خاصهم يشكرو لقجع ماشي يسبوه كيف دارو شي وحدين ماشي كلشي.

اذن الحمرا ما ترضاش تربح بطولة بلا ما تكملها. ما محتاجاش. غادية تكون البطولة ودادية