سهام البارودي- كود//
ففرانسا و بزاف ديال الدول الاوروبية بدات الموجة الخامسة ديال كورونا و مع ظهور الڤاريون الجنوب ايفريقي ديال كوڤيد شبح السدان و التزيار رجع لبزاف ديال البلدان مابعادش علينا! وواخا المغرب دار خطوة استباقية و وقف الاسفار مع فرانسا و مجموعة د الدول ! ولكن احتمال انه تاحنا نعيشو موجة جديدة ديال كوڤيد غير مستبعد و امكانية انه الڤاكسان الحالي يكون بدرجة فعالية اقل مع المتحور الجديد ديال كورونا تاهي غير مستبعدة ! ايوا دابا كيفاش تشرح هادشي للمغاربة فين بقات !؟ حيت عندنا بنادم صافي نسا شي حاجة سميتها كورونا ! لي ملقح كايقوليك علاش ندير الكمامة ياك تلقحت! و لي ماملقحش هاداك ماندويوش عليه خارج التاريخ !
من نهار بدينا كانتقاتلو مع كوڤيد فبلادنا و الحكومة كاتبين على عجز كبير فالتواصل ! ماكاين غير السدان و التزيار و الطرش و سير دير اللقاح و باراكا من الفهاما و اجي لهنا زيد جرعة اخرى و لا غانمنعوك من المرافق العمومية ! ماكانشوفوش فوسائل الاعلام برامج موجهة للتوعية حول كورونا و لي تكون بالشفافية اللازمة باش تعتارف للناس بلي الڤيروس جديد و خاصنا وقت باش نتحكمو فيه و فالتطور ديالو و بيدما يوصل داك الوقت خاصنا نحميو راسنا فحال گاع عباد الله بالڤاكسانات و الرابيل ديال الڤاكسان و الاجراءات الوقائية !
الحكومة خاصها هي تنقص من قوة الفهامة الخاوية و تهضر مع الناس باللغة لي كايفهموها باش تواجه الافكار الخرائية لي كايروجوها صحاب نظرية المؤامرة و “شريحة بيل گيگس” و لي هوما كايروجو ليها بلغة بسيطة كاتلقى صدى عند المتلقي الجاهل !
لي خاص الناس يعرفوه و يفهموه مزيان انه الطب ماشي “علم حق” une science exacte فحال الماط مثلا ! هوا مجال مبني على تجارب و استنتاجات كاتبنى و تتصحح على مدار السنين و هادشي طبعا كايشكل نقطة قوة اكثر ماهي نقطة ضعف ! و العالم مدين للطب و للادوية و الڤاكسانات بإطالة أمد الحياة و محاربة بزاف ديال الڤيروسات و الأوبئة لي كانت كاتفرتك للبشار زكو في الازمنة الغابرة و لي اليوم بفضل التجارب و الاستنتاجات و التصحيح و التطور التكنولوجي قضينا عليها وولات من الماضي!
الطب هو كذلك “ملاحظات ” ، مثلا فرحلة العلاج ديال بزاف ديال السرطانات كاينة واحد المرحلة سميتها وايت اند سي ! يعني ” تسنا و شوف” ! ايه تقدر تكون مريض و يشخصو عندك سرطان فلان فلاني و لكن مايدخلوكش دغيا دير عملية استئصال الورم حيت كايشوفو مثلا انه التطور ديالو كاياخد وقت طويل و العملية تقدر يكونو عندها انعكاسات سلبية على المريض فالوقت الحالي لذلك غايختار الطبيب انه “مايدير والو” !
المشكل فهاد الوقت انه الفهايمية لي مافاهمين تا قلوة كثرو بزاف ! بنادم كان كايجيب جوج فالشيمي و واحد و نص فالماط و ربع نقطة فالعلوم الطبيعية و ماعمرو كانت عندو الشجاعة يهز صبعو و يشارك فالقسم و لا لومفي ولات عندو شي حاجة سميتها الفايسبوك وواتساب ينشر فيها الافكار الخرائية ديالو بلغة بسيطة ! تبسيط العلوم كان عندو دور فأنه خلا بزاف ديال المكلخين يصحاب ليهم راسهم يقدرو يفهمو العلم و يناقشوه احسن و اكثر من مواليه و لا زدتي على هاد الخليط درديرة ديال الفكر الخوانجي و السلفي الخامج مع راس معلقة ديال الفكر اليساروي غاتعطيك قنبلة موقوتة ! كوكطيل مولوطوڤ!
واش حنا عارفين كلشي على كوڤيد ؟ لا ! واش صافي غي نديرو اللقاح و غانرجعو لحياتنا الطبيعية ؟ لا ! واش مازال غايجي عاوتاني ؟ احتمال كبير … ايوا كيفاش غانديرو معاه ؟ غانتعايشو معاه فحال بزاف ديال الڤيروسات لي كانتعايشو معاها لحد الساعة فحال السيدا ! فحال ليباتيت ! لي لحد الساعة العلم ماقدرش يقضي عليهم تماما و لكن بالمقابل كايكونطروليهم بالادوية و الفاكسانات !
هاكا خاص تكون الهضرة لي غاتوجه لعباد الله ! واش غانوري انا لي كانشد جدريال للوزير لي كايشد الملاين كيفاش يهضر مع المواطنين ؟