عفراء علوي محمدي- كود// تصوير: ايس برس//

الدار اللي رابت لبارح فحي سباتة فمدينة كازا، تسببات فوفاة شخص واحد سميتو (م.ح)، وهو راجل زوفري عندو 54 عام، كيخدم حلاق فنفس البلاصة.

الحلاق اللي جبدوه البومبية من تحت أنقاض، مات متأثر بكسور وجروح بليغة تعرض ليها بسباب الانهيار، ومنين جبدوه كان ديجا فارق الحياة.

وفالمقابل، العائلة الوحيدة اللي ساكنة فالدار المكونة من 3 ديال الطوابق، نجات من الموت بأعجوبة.

وعملية البحث تحت الأنقاض وإزاحتها مازالة مستمرة للآن، وشهود عيان كيرجحو لا يكون مازال شي حد آخر حاصل تحت الحجر.

والسلطات فتحات تحقيق باش تعرف أسباب الانهيار والعوامل اللي تسببات فيه.

وحي سباتة عرف سقوط ديور كثار قدامين شوية، أهمهم دار مكونة من 4 طوابق كانت طاحت ف2016، وخلف سقوطها وفاة 4 ضحايا، كيف تسبب فعاهة مستديمة لسيدة تقطعات ليها رجليها.